अखबार नेपाल ट्रेन्डिङ

काठमाडौं: नेपालगञ्जमा फागुन २६ गते शनिबार ‘म्यूजिक फर हार्मोनी’ (सद्भावका लागि संगीत) कार्यक्रम हुने भएको छ । नेपाल कल्चर फेस्टिवलको अवसर पारेर अन्तरालको व्यवस्थापनमा उक्त कार्यक्रम गर्न लागिएको हो ।

म्यूजिक फर हार्मोनीका लागि राष्ट्रिय अन्तर्राष्ट्रिय रुपमै ख्यातिप्राप्त व्याण्ड ‘कुटुम्व’ तथा गायिका झुमा लिम्बु र रैथाने व्याण्डले पहिलो पटक सहकार्य गर्दैछन् । ‘कुटुम्ब’ले नेपाली लोक बाजाहरुको प्रर्वद्धन,  अनुसन्धान र संरक्षणलाई प्रमुखता दिई नेपाली लोकधुनहरुलाई नेपाल मात्र होईन, संसारका धेरै देशका सांगीतिक मञ्चहरुमा प्रस्तुति गरिसकेको छ ।

नेपाली लोक बाजा र धुनहरुलाई नयाँ पुस्ता माझ पुर्याउन कुटुम्बको ठूलो भूमिका छ । पुराना नेपाली लोक गीतहरुको धुनलाई पूर्णत:  लोकबाजाबाटै प्रस्तुत गरेर कुटुम्बले नयाँ पुस्ताका दर्शकहरुलाई पनि जुरुक्कै उचाल्ने गरेको छ । गायिका झुमा लिम्वु ‘भर्सटाईल’ गायिका हुन् । नेपाली रैथाने संगीतमा गहिरो अध्ययन गरेकी झुमाले विदेशी भूमिमा धेरै प्रस्तुति दिएकी छन् ।

‘म्युजिक ट्रयाक’ मा गीत नगाउने पहिचान बनाएकी लिम्वुले विदेशी र स्वदेशी संगीतकर्मीहरुलाई समेटेर ‘रैथाने’ व्याण्ड मार्फत काम गरिरहेकी छन् । सुदूर पश्चिमको देउडादेखि विभिन्न भाषा-भाषीका गीत, पूर्वको लिम्वु संस्कृतिको पालामसम्म आफ्नो स्टेज प्रस्तुतिमा समेट्ने गरेकी झुमा लिम्वु चलचित्रका गीत र पार्श्व गायनमा समेत सक्रिय छिन् । झुमा सहितको टिमले नेपाली मौलिक बाजाहरुको अध्ययन गर्ने क्रममा आफैले केही नयाँ बाजाहरु बनाएका छन् ।

देशैभरको संस्कृति एकै ठाउँमा झल्काउने गरि आयोजना गरिएको नेपाल कल्चर फेस्टिवलको तयारी तीब्र पारिएको अन्तरालका कार्यक्रम संयोजक गणेश राईले बताए । म्यूजिक फर हार्मोनीले नेपालगञ्जबाट संसारलाई सद्भावको सन्देश दिनेछ । नेपालगञ्ज रंगशालामा हुने यस कार्यक्रमको टिकट बिक्री केही दिनमै शुरु हुनेछ भने विद्यार्थीलाई विशेष सहुलियत हुनेछ ।