अखबार नेपाल ट्रेन्डिङ

काठमाडौं: नेपाल सुपर लिग (एनएसएल)को दोस्रो क्वालिफायरमा पोखरा थन्डर्सलाई २-१ गोल अन्तरले पराजित गर्दै ललितपुर सिटी एफसी फाइनलमा पुगेको छ ।

त्रिपुरेश्वरस्थित दशरथ रंगशालामा भएको अतिरिक्त समयसम्म लम्बिएको खेलमा ललितपुरले खेलको ३३औं मिनेटमा निखिल कदमले रातो कार्ड पाएपछि ललितपुर १० खेलाडीमा सिमित भएको थियो । पहिलो हाफको इन्ज्युरी समयमा इमोह इजेकेलले ललितपुरलाई अग्रता दिलाए । दोस्रो हाफमा पापा अनोरले पोखराका लागि बराबरी गोल फर्काए । अतिरिक्त समयमा कुशल देउवाले गरेको गोल नै निर्णायक बन्यो ।

लिग तालिकामा शिर्ष स्थान हासिल गरेको पोखरा पहिलो क्वालीफायरमा धनगढी विरुद्ध टाईब्रेकरमा पराजित हुँदै दोस्रो क्वालीफायर खेल्न बाध्य भएको हो भने ललितपुर इलिमिनेटरमा काठमाडौँलाई ३-० ले पराजित गर्दै यहाँको यात्रा तय गरेको हो । आजको विजेता ललितपुरले धनगढी एफसीसँग शनिवार उपाधिका लागि प्रतिस्पर्धा गर्नेछ । प्रतियोगिताको विजेताले ७० लाख रुपैयाँ नगद पुरस्कार पाउनेछ भने उपविजेता टोलीले २० लाख रुपैयाँ नगद पाउनेछ ।