अखबार नेपाल ट्रेन्डिङ

काठमाडौं: फिफा विश्वकप २०२६ र एएफसी एसियन कप २०२७ को संयुक्त छनोट अन्तर्गत दोस्रो चरणको दोस्रो खेलमा आज नेपाल र यमनबीच प्रतिस्पर्धा हुँदैछ ।

त्रिपुरेश्वरस्थित दशरथ रङ्गशालामा हुने यी दुईबीचको खेल साँझ ७ बजे सुरु हुने छ । एएफसी एशिया कप २०२७ का रूपमा समेत हेरिएको यो खेलमा नेपाल जित निकाल्नै पर्ने दबाबमा छ ।

यमन फिफा वरीयतामा नेपालभन्दा १७ स्थान अघि छ । तर घरेलु मैदान र दर्शकका सामुन्ने यमनलाई पहिलो पटक हराउने नेपालको लक्ष्य छ । नेपालले यमनसँग अहिलेसम्म चार खेल खेलेको छ । तर नेपालले कुनै खेल जित्न सकेको छैन । सन् २०१७ मा नेपालमै भएको एएफसी कप छनोटको खेलमा यमनलाई गोलरहित बराबरीमा रोक्नु नै नेपालको उत्कृष्ट प्रदर्शन थियो ।

एन्फाले टिकट आफै बिक्री गर्ने, घर फर्कदा दर्शलाई निःशुल्क बस सेवा

विश्वकप छनोटको यमनविरुद्धको खेलको टिकट एन्फाले आफै बिक्री गर्ने भएको छ । एन्फाले सोमबार बिज्ञप्ति निकाल्दै टिकट आफैले व्यवस्थापन गरेर बिक्री गर्ने जनाएको हो । यसअघि एन्फाले खुल्ला टेन्टरमार्फत टिकट बिक्री गर्दै आएको थियो ।

एन्फाले साधारण प्यारापिटतर्फ ४ सय र भिआईपी प्यारापिटतर्फ १ हजार टिकट दर कायम गरेको छ । खेल हेरर घर फर्कने दर्शकलाई एन्फाले विभिन्न रुटमा १५ वटा निःशुल्क बसको व्यवस्था गरिएको जनाएको छ । बस सेवाका लागि दर्शकहरुले टिकटको अर्धकट्टी देखाउनुपर्ने छ ।

एन्फाले दोस्रो चरणको सम्पुर्ण खेलको कमर्सियल र मिडिया अधिकार सिंगापुरस्थित स्पोर्ट फाइभलाई दिईसकेको छ ।