अखबार नेपाल ट्रेन्डिङ

एजेन्सीः रुसको निजी सैन्य समूह वागनर समूहका प्रमुख येभगेनी प्रिगोजिनसहित १० जना सवार विमान दुर्घटनामा परि मृत्यु भएको छ ।

विमान राजधानीबाट करिब ३०० किलोमिटर उत्तरमा टभर क्षेत्रको कुझेनकिनो गाउँ नजिकै दुर्घटना भएको हो । जहाजमा तीन जना चालक दलका सदस्यसहित १० जना सवार थिए । प्रारम्भिक जानकारीका अनुसार जहाजमा सवार सबैको मृत्यु भएको छ । रुसको आपतकालीन अवस्था मन्त्रालयले जनाएको छ ।

रुसको संघीय हवाई यातायात एजेन्सी रोसाभिएट्सियाले प्रिगोजिन र वाग्नर समूहका कमाण्डर दिमित्री उटकिन सहित सात यात्रुहरूको नाम प्रकाशन गरेको छ । रुसको फेडरल ट्रान्सपोर्ट एजेन्सीले विमान दुर्घटनामा मृत्यु हुनेहरूको सूचीमा येवगेनी प्रिगोजिन र सहसंस्थापक दमित्री अतकिनको नाम पनि सार्वजनिक गरेको छ ।

यो विमान कसैले आक्रमण गरेर जमिनमा खसालेको हो या अरु कुनै कारणले दुर्घटना भएको हो भन्ने एकिन भएको छैन । दुर्घटनापछि विमानमा आगो लागेको थियो । वागनर भाडाका सैनिकको समूह हो । यो समूहका लडाकु पैसाका लागि लड्छन् । रुसले वागनरलाई युक्रेनविरुद्ध लड्न खटाएको थियो ।