अखबार नेपाल ट्रेन्डिङ

काठमाडौं: बालबालिकालाई अध्ययनप्रति उत्प्रेरित गर्ने उद्देश्यले जनक शिक्षा सामग्री केन्द्र लिमिटेडले ‘जनक बालपत्रिका’ प्रकाशन सुरु गरेको छ । विभिन्न विधाका बालोपयोगी पठन तथा अभ्यास सामग्री समेटिएको यस पत्रिकामा स्थापित रचनाकार एवम् बालबालिकाका विभिन्न रचना समावेश छन् ।

आईतबार जनक शिक्षा सामग्री केन्द्र लिमिटेडमा आयोजित एक समारोहकाबीच शिक्षा, विज्ञान तथा प्रविधि मन्त्रालयका सचिव खगराज बरालले पत्रिका विमोचन गरेका थिए । पत्रिका विमोचन गर्दै उनले बालोपयोगी सामग्री समेटिएका यस्ता पत्रिकाले विद्यार्थीको पठन संस्कारको क्षितिज विस्तार गर्ने र पाठ्यान्तर क्रियाकलापमा विद्यार्थीको सक्रियता बढाउने उल्लेख गरे ।

पत्रिकाको समीक्षा गर्दै पाठ्यक्रम विकास केन्द्रका महानिर्देशक डा. लेखनाथ पौडेल, जनक शिक्षाका प्रबन्ध सञ्चालक महेश तिमिल्सिना र लेखक जीवनाथ धमलाले पत्रिकाले समेटेको चैतन्य पक्ष, विषय क्षेत्र विस्तार र निरन्तरता एवम् विद्यार्थीको प्रतिभा प्रस्फुटन र संस्थाको सामाजिक दायित्वको विषयमा चर्चा गरेका थिए ।

चिरञ्जीवी बराल, गणेशप्रसाद भट्टराई, जयन्ती सत्याल र चित्र आचार्यद्वारा सम्पादित जनक बालपत्रिका ६४ पृष्ठको रङ्गीन कलेवरमा रहेको यस पत्रिकाको मूल्य रु. १० मात्र छ भने पत्रिकाको साजसज्जा सन्तोषकुमार दाहालले गरेका छन् ।