अखबार नेपाल ट्रेन्डिङ

काठमाडौं: एसीसी प्रिमियर कपमा नेपाल समूह ‘ए’ को विजेता बन्दै सेमिफाईनलमा प्रवेश गरेको छ । कीर्तिपुरको त्रिवि क्रिकेट मैदानमा भएको खेलमा नेपालले कतारलाई ६८ रनले पराजित गर्दै समूह विजेता बनेको हो ।

नेपालले अब पहिलो सेमिफाइनल खेलमा कुवतेसँग खेल्ने भएको छ । कुवेतले समूह ‘बी’ को निर्णायक खेलमा हङकङलाई ३० रनले हराएपछि सेमिफाइनलमा नेपालसँगको भेट पक्का गरेको हो । त्यस्तै सेमिफाइनल समिकरण पनि पूरा भएको छ ।

नेपाल समूह ‘ए’ को विजेता र कुवेत समूह ‘बी’ को उपविजेताको रुपमा सेमिफाइनल खेल्ने भएका हुन् । त्यस्तै दोस्रो सेमिफाइनल खेलमा समूह ‘ए’ को उपविजेता ओमान र समूह ‘बी’ को विजेता युएईबीच प्रतिस्पर्धा हुनेछ ।

समूह ‘ए’ मा नेपाल ४ खेलमा ३ मा जित र १ खेलमा अंक बाँड्दै ७ अंकका साथ शीर्ष स्थानमा रह्यो । ओमान ४ खेलमा ३ मा जित र १ खेलमा हारका साथ ६ अंकका साथ दोस्रो स्थानमा रह्यो । समूह ‘बी’ मा युएई ४ खेलमा ३ मा जित र १ खेलमा हारसहित ६ अंकका साथ शीर्ष स्थानमा रह्यो ।

कुवेत ४ खेलमा ३ मा जित र १ मा हारसहित ६ अंकका साथ नेटरनरेटको कारण दोस्रो स्थानमा रह्यो । युएईको नेटरनरेट २.४६८ हुँदा कुवेतको ०.२२३ रह्यो । सेमिफाइनल शनिबार र फाइनल आइतबार हुनेछ ।

यस प्रतियोगिता विजेता टोलीले आगमी सेप्टेम्बरमा हुने एसिया कपमा भारत र पाकिस्तानसँग खेल्न पाउनेछ । त्यस्तै शीर्ष तीन टोलीले आगमी जुनमा हुने एसिसी इमर्जिङ टिम्स एसिया कप खेल्न पाउनेछन् ।

नेपालले समूह चरणमा मलेसियालाई ६ विकेट, ओमानलाई ८४ रन र कतारलाई ६८ रनले हराउँदै सेमिफाइनल स्थान बनाएको थियो । साउदी अरेवियासँगको खेल भने वर्षाको कारण रद्ध भएको थियो ।

कुवेत पहिलो खेलमा युएईसँग १ सय ४३ रनले पराजित भएको थियो । त्यसपछि बहराइनलाई दुई विकेट, सिंगापुरलाई ४ विकेट र हङकङलाई ३० रनले हराउँदै सेमिफाइनलमा स्थान बनायो ।

हङकङको लागि भने बहराइनसँगको खेल वर्षाको कारण रद्ध हुनु घातक बन्यो । हङकङ ४ खेलमा २ मा जित, १ मा हार र १ खेलमा अंक बाँड्दै तेस्रो स्थानमा रहेर बाहिरियो । बहराइन ४ खेलमा १ मा जित, २ खेलमा हार र १ खेलमा अंक बाँड्दै ३ अंकका साथ चौथो स्थानमा रहेर बाहिरियो । सिंगापुर सबै खेलमा जित विहीन हुँदै बाहिरियो ।