अखबार नेपाल ट्रेन्डिङ

काठमाडौं: बलात्कारको आरोप लागेका क्रिकेटर सन्दीप लामिछाने थुना मुक्त भएका छन् । अदालतमा धरौटी वापतको २० लाख रुपैयाँ रकम बुझाएर सन्दीप छुटेका हुन् ।

उच्च अदालत पाटनले बिहीबार सर्त सहित सन्दीपलाई २० लाख धरौटीमा छोड्न आदेश दिएको थियो । अब उनी जेलबाहिर बसेर मुद्धा लड्न पाउनेछन् । यो मुद्दाको किनारा भने लागिसकेको छैन ।

अहिले राष्ट्रिय क्रिकेट टिमबाट सन्दीप निलम्बनमा छन् । बलात्कारको आरोप लागेपछि नेपाल क्रिकेट संघ (क्यान) ले उनलाई राष्ट्रिय टिमबाट निलम्बन गरेको थियो ।

सन्दीपमाथि लगाइएको निलम्बन फुकुवा गरेर राष्ट्रिय टिममा फर्काउन मिल्ने वा नमिल्ने विषयमा क्यानले कानुन व्यवसायीसँग छलफल गर्ने भएको छ । क्यानका अध्यक्ष चतुरबहादुर चन्दका अनुसार यो विषयमा क्यानले अन्तर्राष्ट्रिय क्रिकेट काउन्सिल (आइसिसी) सँग पनि सुझाव माग्नेछ ।

त्यसपछि मात्र क्यानले निर्णय गर्ने क्यान अध्यक्ष चतुरबहादुर चन्दको भनाइ छ । शुक्रबार थुनामुक्त भएपछि सन्दीपले सुरुमा केही समय परिवारसँग समय बिताउने बताएका छन् । क्रिकेटमा फर्कने विषयमा सोधेको प्रश्नमा सन्दीपले भने, ‘छिट्टै क्रिकेट मैदान फर्किन्छु, एकदमै राम्रोसँग फर्कन्छु ।’ थुनामुक्त भएपछि सन्दीप काठमाडौंमा बस्नेछन् ।

सन्दीपलाई अदालतले ५ वटा शर्तमा मात्रै थुनामुक्त गर्न आदेश दिएको हो । उक्त आदेशको पालना नगरी उल्लंघन गरेको पाइएमा उनी पुन: थुनामा पठाइनेछ । उनलाई अदालतले विदेश जान रोक लगाएको छ । काठमाडौं उपत्यका छाड्न पनि जिल्ला प्रहरी परिसर काठमाडौंको अनुमतिमा मात्रै पाउने छन् ।

अदालतले उनीमाथि निगरानी राख्न पनि भनेको छ । आदेशहरूको पालनाको प्रभावकारिताको प्रयोजनका लागि सन्दीपको गतिविधिको निगरानी गर्ने एवं उनको मोबाइल नम्बर, वा विवरणको सञ्चार संचार अभिलेख गर्न प्रहरी प्रधान कार्यालयले सुरक्षित र उपयुक्त व्यवस्था मिलाउन सक्ने भनिएको छ ।

#सन्दीप लामिछाने