अखबार नेपाल ट्रेन्डिङ

काठमाडौं: प्रधानमन्त्री पुष्पकमल दाहाल ‘प्रचण्ड’लाई नेपाली कांग्रेसले विश्वासको मत दिनुलाई कांग्रेसभित्रै अस्वाभाविक मानिएको छ ।

किनभने, दाहाललाई विश्वासको मत दिएपछि प्रतिनिधिसभाको सबैभन्दा ठूलो दल, नेपाली कांग्रेस कानूनी रूपमा जेसुकै भएपनि राजनीतिक नैतिकताका हिसाबले धर्मसंकटमा परेको छ । कांग्रेसले विनाशर्त विश्वासको मत दिनुले कोर्स करेक्सन नै भएको कांग्रेस सांसद श्याम घिमिरे बताउँछन् ।

‘गठबन्धनको नेतृत्व गरेकाले गठबन्धन जोगाउन नसक्नु नेतृत्वको कमजोरी थियो । तर संसद् विघटनको विषयमा संसदमा दुई दिन नेताहरूको प्रस्तुति देख्दा ध्रुवीकरण गराउने विषय देखायो,’ घिमिरेले भने, ‘केपी ओलीको स्वभाव धेरै मिलाएर लान सक्ने होइन । केही कुरा सहन पनि सक्दैनन् । प्रचण्डले पनि गठबन्धनलाई बचाएर कति लान सक्छन् ? ओलीभन्दा गठबन्धन बचाउन सक्ने क्षमता देउवामा छ, यसैले विनाशर्त विश्वासको मत दिएर सभापतिले कोर्स करेक्सनको बाटो लिनुभएको देखिन्छ ।’

विश्वासको मतको बहानामा प्रतिनिधिसभाको पहिलो बैठक र दोस्रो बैठकमा कांग्रेस सभापति देउवाले ओलीबाट दुई पटकसम्म भएको संसद् विघटनको विषयलाई बल्झाएर राजनीतिलाई फेरि पुरानै ध्रुवीकरणमा फर्काउन प्रयास गरेका छन् । देउवा यसैलाई बहाना बनाएर ओली र प्रचण्डबीच खेल्ने दाउमा देखिएका छन् ।