अखबार नेपाल ट्रेन्डिङ

काठमाडौं: प्रतिनिधि सभाको सभामुखको निर्वाचन आगामी माघ ५ गते हुने भएको छ । सभामुखको निर्वाचन कार्यतालिका भने माघ ३ गते प्रकाशित हुनेछ ।

प्रतिनिधि सभाको ज्येष्ठ सदस्यको रूपमा सभाको अध्यक्षता गरिरहेका सभाध्यक्ष पशुपति समशेर जबराले आजको बैठकको अन्त्य गर्दै सभामुखको निर्वाचनको लागि माघ ५ को मिति तोकेका हुन् ।

सभाध्यक्ष जबराले प्रतिनिधि सभा नियमावली २०७५ को नियम ७ बमोजिम सभामुखको निर्वाचनको मिति तोकेका हुन् । संवैधानिक व्यवस्थाअनुसार प्रतिनिधि सभाको पहिलो बैठक बसेको १५ दिनभित्र सभामुख निर्वाचित गर्नुपर्छ ।

मंगलबार प्रधानमन्त्री पुष्पकमल दाहाल ‘प्रचण्ड’ले विश्वासको मत प्राप्त गरेसँगै सभामुख चयनको मिति तोकिएको हो ।

प्रधानमन्त्री प्रचण्डले उपस्थित २७० सांसदमध्ये २६८ मत प्राप्त गरेका छन् । उनलाई नेपाल मजदुर किसान पार्टी र राष्ट्रिय जनमोर्चाले मात्रै विश्वासको मत नदिएका हुन् ।