अखबार नेपाल ट्रेन्डिङ

काठमाडौं: मंगलबारबाट काठमाडौंमा साफ महिला च्याम्पियनसिप आयोजना हुँदैछ । प्रतियोगिताका लागि सहभागी हुन सातवटै देशका टोली नेपाल आइपुगिसकेका छन् ।

‘लिग कम नकाउट’ प्रणालीमा हुने प्रतियोगितामा नेपालसहित भारत, पाकिस्तान, बंगलादेश, भुटान, माल्दिभ्स र श्रीलंकाले प्रतिस्पर्धा गर्नेछन् ।

प्रतियोगिताको समूह ए मा नेपाल, श्रीलंका र भुटान छन् भने समूह बी मा भारत, बंगलादेश र पाकिस्तान छन् । प्रत्येक समूहबाट पहिलो र दोस्रो हुने टिम सेमिफाइनल प्रवेश गर्नेछन् ।

कुन टोली कस्तो ?

नेपालः

साफ च्याम्पियनसिप आयोजना गर्ने अवसर नेपालले पाएको छ । महिला साफमा पटकपटक फाइनलमा पुगेर पनि च्याम्पियन बन्न नपाउनु नेपालको दुर्भाग्य बन्दै आएको छ । एकपटक बाहेक नेपालले सबै महिला साफको फाइनलको यात्रा तय गरेको छ । सबैमा फाइनल खेलमा भारतसँग पराजित बन्दै उपाधिबाट बञ्चित हुने गरेको छ ।

यसपटक फेरि पनि उपाधिको होडमा छ । फिफा वरीयतामा १०२औं स्थानमा रहेको नेपालको नियमित कप्तान तथा प्लेमेकर रेनुका नगरकोटे लगायत खेलाडी चोटबाट गुज्रनुले नेपालको प्रदर्शनमा केही प्रभाव पर्ने देखिन्छ ।

प्रशिक्षक कुमार थापाले फेरि नेपाली टोली सम्हालेका छन् च्याम्पियन बनाउने लक्ष्य लिएर नेपालको बलियो प्रतिस्पर्धीका रुपमा सदाबाहर भारत र बंगलादेश हुने देखिन्छ । समूह ‘ए’  मा परेको नेपालसँग भुटान र श्रीलंका छन् ।

श्रीलंकाः

फिफा वरीयतामा १५३ औं स्थानमा रहेको श्रीलंकाले साफ च्याम्पियनसिपमा सेप्टेम्बर ९ मा भुटानसँग खेल्दै प्रतियोगिताको सुरुवात गर्नेछ । त्यस्तै दोस्रो खेलमा सेप्टेम्बर १२ मा नेपालसँग खेल्नेछ । साफ च्याम्पियनसिपमा श्रीलंकाले हालसम्म बलियो दाबेदारी प्रस्तुत गरेको छैन । अघिल्लो साफ च्याम्पियनसिपमा माल्दिभ्सलाई २-० ले हराएको श्रीलंकाले भारतसँग ५-० र नेपालसँग ४-० को पराजय ब्यहोरेको थियो ।

भुटानः

फिफा वरीयतामा १७६ औं स्थानमा रहेको भुटानी महिला टोलीको इतिहास पनि धेरै लामो छैन । सन् २००४ बाट आधिकारिक रुपमा सुरु भएको भुटानी फुटबलले दक्षिण एसियाली स्तरमा बलियो चुनौती प्रस्तुत गर्न सकेको छैन ।

यद्यपि पछिल्लो समय ग्रासरुटमा केन्द्रीत रहेको भुटानको टोली राम्रो बन्दै आएको बताइन्छ । भुटानमा ६ वटा महिला टिमले लिग खेलिरहेकोमा सन् २०२२ मा यो संख्या बढेर १० पुगेको थियो ।

पछिल्लो साफको कुरा गर्दा भुटानले बंगलादेशसँग २-० र नेपालसँग ३-० को पराजय ब्यहोरेको थियो ।

भारतः

समूह ‘बी’ मा रहेको भारत उपाधिको प्रबल दाबेदार हो । फिफा वरीयतामा दक्षिण एसियामा सबैभन्दा माथि रहेको भारत ५८औं स्थानमा छ । भारतले सेप्टेम्बर ७ मा पाकिस्तान, १० मा माल्दिभ्स र १२ मा बंगलादेशसँग प्रतिस्पर्धा गर्दैछ । पछिल्लो समय फिफाबाट प्रतिबन्ध ब्यहोरेको भारत साफ च्याम्पियनसिप खेल्न आउने नआउने अन्योलबीच भारतको तयारी भने छोटो छ ।

पछिल्लो साफमा (२०१९) भारतले माल्दिभ्समाथि ६-०, श्रीलंकामाथि ५-०, बंगलादेशमाथि ४-० र नेपालमाथि १-३ गोलअन्तरको जित निकाल्दै च्याम्पियन बनेको थियो ।

बंगलादेशः

पछिल्लो समय बंगलादेशका महिला टोलीले अब्बल प्रदर्शन गर्दै आएको छ । फिफा वरीयतामा १४७औं स्थानमा रहेको बंगलादेशले एएफसीका केही प्रतियोगिता र साफका उमेर समूहमा बंगलादेशी टोलीले आफ्नो क्षमता देखाइसकेको छ । बंगलादेशले आफ्नो समूहमा भारत, माल्दिभ्स र पाकिस्तानसँग प्रतिस्पर्धा गर्नेछ । साफको इतिहास हेर्ने हो भने नेपाल र भारत बंगलादेशी टोलीका लागि टाउको दुखाइ बन्दै आएका छन् ।

बंगलादेशमा सन् २०१९ को साफमा भुटानलाई २-० गोल अन्तरले हराएको थियो भने नेपालसँग ३-० र भारतसँग ४-० गोलको पराजय ब्यहोरेको थियो ।

पाकिस्तानः

पाकिस्तान भारतभन्दा अघि फिफाको प्रतिबन्धमा परेको दक्षिण एसियाली मुलुक हो । अझ पाकिस्तानी महिला फुटबल टोलीले ८ वर्षपछि अन्तर्राष्ट्रिय प्रतियोगितामा फर्कँदै छ । पाकिस्तानको २३ खेलाडीमध्ये अघिल्लो खेल पाकिस्तानबाट खेलेका ७ खेलाडीबाहेक अन्य खेलाडी पहिलोपटक पाकिस्तानको जर्सीमा मैदान उत्रदैछन् ।

पाकिस्तान फुटबल संघले दोहोरो नागरिकता राष्ट्रियता भएका खेलाडीलाई राष्ट्रिय टोलीमा प्रतिनिधित्व गर्न अगस्टमा खुला गरेको थियो । प्रतिबन्धबाट फुकुवा भएयता संघले अमेरिका, ग्रीस, यूके र यूएईका दर्जन बढी पाकिस्तानी मुलका खेलाडीले पाकिस्तानबाट खेल्न चासो देखाएका थिए । फिफाको नियमका हिसाबले दोहोरो नागरिकता भएका खेलाडीले या त होम टिमबाट या आफ्नो ‘मुल’ भएको देशको टिमबाट छनोट गर्न पाउँछ ।

माल्दिभ्स

फिफा वरीयतामा १५६औं स्थानमा रहेको माल्दिभ्सले प्रतियोगितामा सेप्टेम्बर ७ मा बंगलादेशसँग खेल्दै प्रतियोगिताको सुरुवात गर्नेछ । त्यस्तै सेप्टेम्बर १० मा भारत र सेप्टेम्बर १३ मा पाकिस्तानको सामना गर्नेछ । अघिल्लो साफ च्याम्पियनसिपमा माल्दिभ्सले भारतसँग ६-० गोलअन्तर र श्रीलंकासँग २-० को पराजय ब्यहोरेको थियो । माल्दिभ्सले पुरुषतर्फ साफ च्याम्पियनसिपमा राम्रो दाबेदारी प्रस्तुत गर्ने गरेको भए पनि महिलातर्फ भने फाइनलमा स्थान बनाउन सकेको छैन ।