अखबार नेपाल ट्रेन्डिङ

काठमाडौं: रुसले युरोपमा ग्यास आपूर्ति गर्ने मुख्य पाइपलाइन आजदेखि बन्द गरेको छ । नर्ड स्ट्रीम-वान नामको पाइपालाइन परियोजना रुसले आजदेखि पूर्णरुपमा बन्द गरेको हो ।

रुसी अधिकारीहरुले पाइपलाइन ममर्तका लागि भन्दै तीन दिनका लागि बन्द गरिएको बताएका छन् । यो पाइपलाईन रुसको सेन्ट पिटर्सबर्गबाट पूर्वी जर्मनीसम्म १२ सय किलोमिटर लामो छ ।

बाल्टिक समुद्रको पिँधमा बिछ्याइएको पाइपलाइन मर्मतका लागि भनिएपनि रुसले आफूविरुद्धको प्रतिबन्धको बदलामा बन्द गराएको पश्चिमा देशहरुको आरोप छ ।

तर, रुसले पश्चिमाहरुको आरोप अस्वीकार गरेको छ । यो पाइपलाइनबाट अहिले पनि क्षमताको २० प्रतिशत ग्यासमात्रै आपूर्ति हुँदै आएको थियो ।

योसँगै रुसले युरोपमा ग्यास तथा तेल आयातका लागि नर्ड स्ट्रीम-टू पाइपलाइन परियोजना तयार गरेको छ । तर रुसले युक्रेनमाथि आक्रमण सुरु गरेदेखि यो परियोजनाको भविष्य अन्योलमा परेको छ ।

युक्रेनमाथि रुसी आक्रमणपछि रुससँग युरोप र पश्चिमा देशहरुको विवाद बढ्दै जाँदा ग्यासलगायत इन्धनको व्यापार संकटमा परेको छ ।