अखबार नेपाल ट्रेन्डिङ

काठमाडौं: तेक्वान्दो खेलाडी एबम् भूतपूर्व ब्रिटिश आर्मी राजकुमार राईद्वारा अभिनित चलचित्र ‘सोल अफ द कमाण्डो’ को प्रिमियर शो बेलायतमा रेड कार्पेट सहित हुने भएको छ ।

बेलायतको अल्डसर्टस्थित प्रिसेन्स हलमा यही २७ अगष्टका दिन नेपाली सिने जगतका अधिकांश चर्चित लोकप्रिय कलाकारहरुको बाक्लो उपस्थितिमा चलचित्रको प्रदर्शन गर्न लागिएको निर्माण पक्षले जानकारी दिएको छ ।

रेड कार्पेट सहितको बिशेष प्रिमियर शोमा कलाकारहरुको साथै बेलायतमा रहेका बिशिष्ट ब्यक्तित्वहरुको पनि बिशेष उपस्थिति रहने छ ।

चलचित्रको पहिलो प्रिमियरपछि बेलायतकै विभिन्न मुख्य शहरहरुमा पनि चलचित्रको प्रदर्शन गरिने चलचित्रका निमार्ता एबम् कलाकार राज कुमार राईले बताए ।

नेपाल लगायत बिभिन्न देशमा समेत छायांकन गरिएको चलचित्र ‘सोल अफ द कमाण्डो’ले नेपाली चलचित्रको क्षेत्रमा नयाँ आयाम ल्याउने बिश्वास आयोजक पक्षको रहेको छ ।

युवराज राई (वीरबहादुर)द्वारा निर्देशित यो चलचित्र रवि थापा, धन लिम्बु र मिलन राईले निमार्ण गरेका हुन । एक आर्मी संघर्षलाई चलचित्रको कथाबस्तुमा समेटिएको निर्माण पक्षले जनाएको छ ।

चलचित्रमा राजकुमार राई, कमला खापुङ लिम्बु, सेसुका राई, रवि थापा, मिलन राई, शिशिर वाङदेल, रुपेश झा, नरेन खड्का, सर्मिला लिम्बु, सीमा राई, नरेन लिम्बु, पुर्ण लिम्बु लगायतका कलाकारहरुको अभिनय रहेको छ ।

को हुन् राजकुमार राई ?

चलचित्र ‘सोल अफ द कमाण्डो’ का अभिनेता राजकुमार राई कलाकारसँगै उनी कुशल खेलाडीका साथै ब्रिटिस आर्मीका भूतपूर्व वास्तविक कमाण्डर समेत हुन् । बि.स.२०५६ सालमा नेपालमा आयोजित आठौं साफ गेममा उनले नेपाललाई तेक्वान्दोमा स्वर्ण पदक जिताएका थिए ।

ग्राण्ड मास्टर सातौं डन समेत रहेका उनी सन् १९८६ मा कोरियामा आयोजित दशौं एशियन खेलमा कांस्य पदक विजेता हुन । उनी नेपाल सरकारबाट गोरखा दक्षिण बाहु पाँचौं पदक र तेश्रो पदक सम्मानबाट विभुषित व्यक्तित्व पनि हुन् ।

कुशल लेखकका रुपमा समेत आफ्नो परिचय स्थापित गरेका उनी अभिनेता, खेलाडी तथा चलचित्रका निर्माता रुपमा परिचित छन । नेपाल, हङकङ, फिलिपिन्स, दक्षिण कोरिया, पाकिस्तान, स्पेन, ईरान लगायतका देशमा उनले कयौं खेल जितेका छन् ।