अखबार नेपाल ट्रेन्डिङ

काठमाडौं: जोरपाटीस्थित सर्वनाम शिक्षालयका होस्टेल वार्डेनले होस्टलमा बस्ने छात्राहरूमाथि यौन दुर्व्यवहार गरेको भन्दै विद्यार्थी र अभिभावक आन्दोलित भएका छन् ।

होस्टेलमा बस्ने छात्राहरूले यौन दुर्व्यवहारको आरोप लगाएका वार्डेन पक्राउ नगरिएको भन्दै शिक्षालय अगाडि आन्दोलन गरिएको हो ।

पीडित छात्राका अभिभावक आज विद्यालयमा गएर उजुरी गरेपछि प्रहरीको टोली त्यहाँ पुगेको हो । केहीबेर त्यहाँ तनाव समेत भएको प्रहरीले जनाएको छ ।

विद्यार्थीले उक्त गुनासो प्रहरीमा समेत जाहेर गरेका छन् । महानगरीय प्रहरी परिसर काठमाडौंका प्रवक्ता, प्रहरी उपरीक्षक दिनेशराज मैनालीले घटनालाई गम्भीर रुपमा लिएको बताएका छन् ।

उनले भने,  ‘हामीकहाँ जानकारी आएको छ । घटनालाई गम्भीर रूपमा लिएर अनुसन्धान गरिरहेका छौं । आरोपित वार्डेनको खोजी भइरहेको छ ।’

होस्टेलमा बस्ने तीनजना छात्रामाथि दुर्व्यवहार भएको बताइएको छ । छात्राहरुले अभिभावकलाई सुनाएपछि विद्यालयमा केहीबेर तनाव भएको थियो । त्यसपछि प्रहरी पुगेर घटनाबारे बुझिरहेको मैनालीले बताएका छन् ।