अखबार नेपाल ट्रेन्डिङ

काठमाडौँ : हिजो बिहानदेखि हराईरहेको तारा यएरको जहाज दुर्घटनाग्रस्त अवस्थामा फेला परेको छ ।

हिजो पोखरादेखि मुस्ताङको जोमसोमका लागि उडेको केही समयमै बेपत्ता जहाज मुस्ताङको थासाङ गाउँपालिका–२ मा दुर्घटनाग्रस्त अवस्थामा फेला परेको नेपाली सेनाले जनाएको छ ।

तारा एयरको नाइन एन एईटी कल साइन भएको ट्वीनअटर जहाज सम्पर्कविहीन भएपछि खोजी कार्य तीव्र पारिएको थियो ।

चालक दलका ३ सदस्यसहित २२ जना सवार उक्त जहाज हिजो दिनभर खोजी गरिए पनि नभेटिएपछि स्थगित गरिएको थियो । आज बिहान ५ बजेदेखि फेरि हवाई र स्थल दुवै तर्फबाट खोजी सुरु गरिएको थियो ।

नेपाली सेनाका प्रवक्ता नारायण सिलवालका अनुसार ल्याङखु खोलाको मुहान नजिकको पहाडमा ठोक्किएर टुक्रा–टुक्रा भएको अवस्थामा जहाज फेला परेको हो । स्थानीय शेर्पाहरुले उक्त जहाज दुर्घटित अवस्थामा फेला पारेका हुन ।

यससम्बन्धी थप विवरण भने आउन बाँकी रहेको छ ।