अखबार नेपाल ट्रेन्डिङ

काठमाडौं: शहरी विकास मन्त्री रामकुरमारी झाँक्रीले पदीय दायित्वको आफ्नो १०० दिनमा नीतिगत सुधारका लागि जोड दिएको दावी गरेकी छिन् ।

मन्त्रालयमा १०० दिनको प्रगति विवरण सार्वजनिक गर्दै मन्त्री झाँक्रीले अहिले शहरी विकासको नीति फाइनल अवस्थामा पुर्‍याएको बताइन् ।

‘सबैभन्दा पहिला नीतिमा सुधार गर्नुपर्‍यो । शहरी विकासको नीति फाइनल अवस्थामा पुर्‍याएका छौँ । नीतिमा हामीले कम्तिमा अन्त्यसम्म बुझ्नुपर्छ । शहरी विकास ऐनको ड्राफ्ट पनि फाइनल अवस्थामा छ,’ झाँक्रीले बताइन् ।

नगर विकास कोष अहिले सानो पुँजीको रहेको र त्यसलाई ठूलो बनाउन लागिएको पनि उनको दावी छ । नागरिकप्रति उत्तरदायी भएका कारण प्रगति विवरण सार्वजनिक गरेको समेत उनले बताइन् ।

मन्त्री झाँक्रीले संसद अवरुद्ध भएका कारण आफ्ना कुरा भन्न नपाएको गुनासो पनि गरिन् ।

उनले शहरी क्षेत्र र शहरी विकास शहरमा बस्ने मान्छेको कुरामा केन्द्रित रहेको बताइन् ।

आफू मन्त्री भएपछि विभिन्न खालका समस्या झेलेको झाँक्रीको भनाइ थियो । उनले मुख्यगरी मन्त्रालयमा समन्वयको अभाव भएको उल्लेख गरिन् ।