अखबार नेपाल ट्रेन्डिङ

रामेछाप: सरकारले देशभर कोरोना विरुद्धको बुस्टर डोज खोप उपलब्ध गराउने घोषणा गरेको भएपनि रामेछाप जिल्लामा भने यसको कुनै अत्तोपत्तो छैन ।

कोरोना संक्रमितको संख्या बढिरहेको बेला सरकारले दुइ मात्रा खोप पुरा गरेकाहरुलाई बुस्टर डोजका रुपमा तेश्रो मात्रा खोप आइतबारदेखि देशभर उपलब्ध गराउने घोषणा गरेको थियो ।

सरकारको घोषणा सुनेर बुस्टर डोज खोपका  लागि स्वास्थ्य केन्द्र पुगेका रामेछापका सर्वसाधारण भने खोप नपाएपछि निराश हुँदै घर फर्कन बाध्य छन् ।

आइतबारबाट सरकारले बुस्टर डोज खोप उपलब्ध गराउने घोषणा गरेको भएपनि अहिले  खोप अभाव भएकाले रामेछाप जिल्लामा कहिलेबाट यसको शुरुवात हुन्छ भन्ने कुरा अनिश्चित भएको जिल्ला स्वास्थ्य कार्यालय रामेछापका प्रमुख शान्तिराम खतिवडाले बताए ।

उनले शनिबार साँझ भर्चुअल बैठक मार्फत आफुहरुलाई बुस्टर डोज खोपका बारेमा जानकारी गराएको भएपनि जिल्लामा खोप नभएकाले काम शुरु गर्न नसकिएको बताए ।

सोमबार खोप लिन पठाउने तयारी गरेको स्वास्थ्य कार्यालय रामेछापले जिल्लामा यो कार्यक्रम एकैदिन शुरु गर्दा अब कम्तिमा एक साता लाग्ने जानकारी दिएको छ ।

अग्रपंक्तिमा काम गर्ने व्यक्ति र ६० बर्ष उमेर नाघेका बृद्धबृद्धालाई पहिलो चरणमा उपलब्ध गराउन लागिएको बुस्टर डोज खोप अवको एक सातापछि उपलब्ध गराउन सकिने अनुमान रहेको स्वास्थ्य कार्यालय रामेछापका प्रमुख खतिवडाले बताए ।

उनले केन्द्रसँग खोप मागेर जिल्लामा ल्याउने तयारीमा आफुहरु जुटेको जानकारी दिए । यता अग्रपंक्तिमा बसेर काम गर्ने व्यक्तिहरु भने खोप नपाएकोमा असन्तुष्ट छन् ।

बुस्टर डोज खोप नपाउँदा असन्तुष्ट रहेका अग्र पंक्तिमा बसेर काम गर्नेहरुले  सरकारले खोपका लागि विना तयारी हल्ला मात्र गरेको आरोप लगाए ।