अखबार नेपाल ट्रेन्डिङ

काठमाडौं: नेपाली कांग्रेसको प्रदेश नम्बर २ मा नयाँ नेतृत्वका लागि आज मतदान हुँदैछ ।

जनकपुरधामस्थित गोपाल धर्मशालामा बिहान ८ बजेदेखि हुने भनिएको मतदान दिउँसो १ बजेका लागि तय भएको छ ।

निर्वाचन समितिका संयोजक प्रह्लाद गौतमका अनुसार प्रदेश २ को नयाँ नेतृत्वका लागि संस्थापन पक्ष र संस्थापन इतर पक्ष प्यानलसहित चुनावी प्रतिस्पर्धामा उत्रिएका छन् ।

सहमतिमा नेतृत्वको टुङ्गो लगाउने प्रयास असफल भएपछि छुट्टाछुट्टै प्यानल बनाइ उम्मेदवार चुनावी मैदानमा उत्रिएका हुन् ।

चुनावी कार्यक्रममा हिजो मंगलबार उम्मेदवारी दर्ता गरिएको छ । मंगलबार दिउँसो १:३० बजे सुरु भएको मनोनयन दर्ता राति ८ बजेसम्म चलेको थियो ।

जम्मा ७४ पदका लागि १८० जनाले उम्मेदवारी दर्ता गराएको निर्वाचन अधिकृत गौतमले जानकारी दिए ।

संस्थापन पक्षले कांग्रेस रौतहटका सभापति कृष्णा यादवको नेतृत्वमा प्यानलसहित उम्मेदवारी दर्ता गराएको छ भने संस्थापन इतर पक्षले कांग्रेस प्रदेश २ का संसदीय दलका नेता रामसरोज यादवको नेतृत्वमा प्यानलसहित उम्मेदवारी दर्ता गराएको छ ।

संस्थापन समूहबाट उपसभापतिमा सर्लाहीका वीरेन्द्र सिंह र बाराका चन्द्रशेखर यादव, महामन्त्रीमा सिरहाका उपेन्द्र यादव र पर्साका वृहस्पतिकुमार श्रेष्ठ तथा सहमहामन्त्रीमा बाराका जयनारायण यादव, सप्तरीका परशुराम चौधरी र सप्तरीकै रीता यादवले उम्मेदवारी दर्ता गराएका छन् ।

यस्तै संस्थापन इतर समूहबाट उपसभापतिमा रौतहटका धनलाल ठोकर र सर्लाहीका विनोद खनाल, महामन्त्रीमा सिरहाका नरेश यादव र सर्लाहीकै हरेस महतो तथा सहमहामन्त्रीमा पर्साका अरविन्द अमात्य, महोत्तरीका विनोद यादव र बाराका निर्मला सुवेदीले उम्मेदवारी दर्ता गराएको निर्वाचन समितिले जनाएको छ ।

प्रदेश २ का ८ जिल्लाको ६४ प्रदेश निर्वाचन क्षेत्रबाट गरी २ हजार मतदाता रहेको निर्वाचन समितिले जनाएको छ ।