अखबार नेपाल ट्रेन्डिङ

काठमाडौं: विप्लव समूले आह्वान गरेको नेपाल बन्दका कारण देशभरको जनजीवन प्रभावित भएको छ । भोजपुरमा प्रहरीको गोलीबाट कार्यकर्ता तीर्थराज घिमिरे मारिएको विरोधमा नेत्रविक्रम चन्द विप्लव नेतृत्वको नेकपाले सोमबार गरेको बन्दका क्रममा सवारीसाधनमा आगजनी भएको छ ।

बन्दको प्रभाव उपत्यका र देशका विभिन्न जिल्लामा पनि परेको छ । विप्लवले बन्द घोषणा गरेपछि राजधानी उपत्यकाका शैक्षिक संस्थाले पठन पाठन नहुने सूचना पठाएका छन् । बन्दले गर्दा देशका विभिन्न जिल्लामा लामो तथा छोटो दुरीका सवारीसाधन चल्न समस्या भएको छ । राजधानीको घट्टेकुलो र सुकेधारामा भएको विस्फोटमा चारजनाले आइतवार ज्यान गुमाएपछि सर्सवाधरण त्रसित भएका छन् ।

बन्दका कारण अधिकांश जिल्लामा सवारी सञ्चालनमा आएका छैनन् भने उद्योग, कलकारखाना र शिक्षण संस्थान पनि ठप्प रहेका छन् । बिहानैदेखि देशका विभिन्न स्थानमा संखासपद बस्तु भेटिएका छन् । मोरङको बुढिगँगा गाउँपालिका १ कोशी कोशी राजमार्गमा, सुन्दरहरैंचाको वडा नम्बर ७ ठडियामा र पाथीभरा टोलमा शङ्कास्पद वस्तु फेला परेको छ ।

त्यस्तै अर्घाखाँची बागीखोलाको कच्बे पुल नजिकै र सन्धिखर्कस्थित आवसीय माविमा पनि शंकास्पद वस्तु फेला परेको छ । त्यस्तै बाराको जीतपुरसिमरा उपमहानगरपालिका-३, बजनीमा एपी ३१ एक्स ६३१६ नम्बरको लरीमा आगजनी भएको छ । मकवानपुरको थाहा नगरपालिका-१ कुन्छाल नजिकै ना ६ ख ८००७ नम्बरको आइचर गाडी जलाइएको छ ।

त्यस्तै हेटौंडाको चौकीटोलमा प्रहरी चौकी नजिकै ना ७ ख ९४९३ नम्बरको मिनी ट्रकमा आगजनी भएको छ । हेटौंडाको बुद्धचोकमा, तनहुँका दुई स्थानमा, पोखराका दुइ स्थानमा रौतहट, धादिङ भक्तपुरमा पनि बम फेला परेका छन् । देशका विभिन्न स्थानमा बम भेटिएपछी देशभरको सुरक्षा व्यवस्था चुस्त बनाइएको छ । बन्दका क्रममा कुनै अप्रिय घटना नहोस् भनेर ठूलो संख्यामा सुरक्षाकर्मी परिचालन गरिएको छ ।