अखबार नेपाल ट्रेन्डिङ

काठमाडौं: नेपाली राष्ट्रिय महिला क्रिकेट टोलीले कतारलाई लगातार दोश्रो खेलमा हराउँदै अन्तर्राष्ट्रिय क्रिकेटमा ऐतिहासिक सफलता हात पारेको छ ।

नेपालले दोस्रो खेलमा कतारलाई ६१ रनले हराउँदै एक खेल अगावै सिरिज २–० ले जितेको छ । नेपाली महिला टोलीले पहिलो पटक सिरिज खेलेको हो ।

नेपालले प्रस्तुत गरेको १ सय ३० रनको विजयी लक्ष्य पछ्याएको कतार १९.३ ओभरमा ६८ रनमा अल आउट भयो । कतारकी कप्तान आयशाले ३२ बलमा २ चौका सहित सर्वाधिक २४ रन बनाइन् । केरी पाउनसेटले १८ बलमा २ चौका सहित १५ रन जोडिन् । पहिलो खेलमा नेपालसँग २७ रनमा अल आउट भएको कतारले दोस्रो खेलमा भने सुधारिएको ब्याटिङ गरेको थियो ।

नेपालले आइसिसी वुमन्स टि-२० एसिया छनोट अघि तयारीको लागि कतारसँग तीन टि-२० आई सिरिज सिरिज खेलेको हो ।

सन् २०२३ मा दक्षिण अफ्रिकामा हुने टि-२० विश्वकपको लागि नेपालसहित ६ राष्ट्रले अर्को वर्ष हुने ग्लोबल छनोटको लागि युएईमा एसिया छनोट खेल्न लागेका हुन् ।

एसिया छनोटमा नेपाल, भुटान, हङकङ, कुवेत, मलेसिया र युएई गरि ६ राष्ट्र सहभागी छन् । विजेता टोलीले आगमी वर्ष हुने टि-२० ग्लोबल छनोट खेल्न पाउने छन् ।