अखबार नेपाल ट्रेन्डिङ

काठमाडौं:  नेपाल पर्यटन बोर्डले   (एनटीबी) संयुक्त राष्ट्र संघीय विकास कार्यक्रम (यूएनडीपी) सँग सहकार्य गरेको छ । एनटीबीले यूएनडीपी सँगको सहकार्यमा जीविकोपार्जन पुनरुत्थानका लागि दिगो पर्यटन परियोजना सुरु गरेको हो ।

२ वर्ष ६ महिना अवधिको परियोजनाका लागि पर्यटन बोर्डले १० लाख डलर तथा यूएनडीपीका तर्फबाट १० लाख ५० हजार सहलगानी गरी कुल २० लाख ५० हजार अमेरिकी डलर बराबरको रकम खर्च गरिनेछ। विशेषगरी पर्यटन क्षेत्रका करिब ५ हजार मजदुरलाई अल्पकालीन रोजगारी सिर्जना गरी राहत पुर्याइने परियोजनाको लक्ष्य छ।

परियोजनाको कार्यक्रमअनुरुप पर्यटन बोर्ड, जीविकोपार्जन पुनरुउत्थानका लागि दिगो पर्यटन परियोजना (एसटीएलआरपी) र नेपाल एसोसियन अफ टुर एण्ड ट्राभल एजेन्टस् (नाटा) बीच बुधबार सम्झौता भएको छ।

सम्झौताअनुसार नाटाले महामारीले रोजगारी गुमाएका साढे ५०० भन्दा बढी पर्यटन मजदुरलाई प्रतिव्यक्ति १२ दिनका दरले अल्पकालीन रोजागारी प्रदान गर्नेछ।

सम्झौता हस्ताक्षर कार्यक्रममा बोर्डका कार्यकारी प्रमुख डा. धनन्जय रेग्मीले कोभिड महामारीका कारण पर्यटन क्षेत्रका धेरै मजदुरले रोजगारी गुमाएको अवस्थामा यस परियोजनाले ती मजदुरको लागि छोटो अवधीको भएपनि रोजगारीको अवसर सिर्जना गर्ने बताए।

परियोजनाले विशेषगरी पदमार्ग, जलयात्रा (राफ्टिङ) गरिने नदी, ट्रेकिङ ट्रेल, हिमाल आरोहण क्षेत्र तथा अन्य पर्यटकीय सम्पदाहरूमा क्षेत्र निर्धारण गरी पर्यटन मजदुरलाई अल्पकालीन रोजगारी दिइने बोर्डका सूचना अधिकारी तथा परियोजनाका राष्ट्रिय संयोजक मणिराज लामिछानेले जानकारी दिए।

पहिलो चरणमा नेपालका मुख्य पर्यटकीय क्षेत्रमा रहेका अतिप्रभावित एक हजार ६०० जनशक्तिलाई पर्यटकीय क्षेत्रको सरसफाइ, पद मार्गको मर्मतसम्भार, पैदल मार्गका सिँढी मर्मतसम्भार, सङ्केत चिन्हको स्थापन तथा मर्मत सम्भारलगायतका कार्यमा संलग्न गराई ४० दिनबराबरको रोजगारी प्रदान गरिने उनले बताए।

यसैगरी परियोजनाअन्तर्गत बोर्ड र नेपाल एशोसिएसन अफ राफिटङ एजेन्सिज (नारा) बीच मंगलबार राफ्टिङ क्षेत्रका २०० मजदुरलाई काम दिने सम्झौता भएको छ। सम्झौताअनुरुप नाराले कोभिड महामारीले रोजगारी गुमाएका करिब २०० मजदुरलाई प्रतिव्यक्ति कम्तीमा १२ दिनको रोजगारी दिनेछ।

यो पनी पढ्नुहोस् :

सनराइज बैंकले भदौ महिनामा नारी विशेष योजना ल्यायो