एन्फा कार्यकारी समितिको आकस्मिक बैठक बस्दै
साफ च्यान्पियनसिप र राष्ट्रिय टोलीका प्रशिक्षकले घोषणा गरेको राजीनामाको विषयमा छलफल
वि.सं.२०७८ साउन १५ शुक्रवार ०८:४०
2.6K
shares
काठमाडौं: अखिल नेपाल फुटबल संघ (एन्फा) कार्यसमितिको आकस्मिक बैठक आज बस्दै छ ।
साफ च्यान्पियनसिप र राष्ट्रिय टोलीका प्रशिक्षकले घोषणा गरेको राजीनामाको विषयमा छलफल गर्न कार्यसमितिको आकस्मिक बैठक बोलाएको हो ।
आज अपरान्ह ४ बजे बस्ने बैठकमा साफ च्यान्पियनसिपका साथै राष्ट्रिय फुटबल टोलीका प्रशिक्षक अब्दुलाह अलमुताइरीले सम्झौता अवधि बाँकी रहँदै सामाजिक सञ्जाल मार्फत् घोषणा गरेको राजीनामाको विषयमा छलफल हुने एन्फाले जनाएको छ ।
प्रशिक्षक अलमुताइरीले सामाजिक सञ्जाल फेसबुकमा एन्फाका वरिष्ठ उपाध्यक्ष पंकज विक्रम नेम्बाङका कारण आफूले राजीनामा गर्नु परेको उल्लेख गरेका थिए ।
उपाध्यक्ष नेम्वाङले प्रशिक्षक अलमुताइरीले आफ्नो चरित्र हत्याको प्रयास गरेको भन्दै छानबिन गर्न माग गरेका छन् ।
दक्षिण एसियाली फुटबल महासंघ (साफ) ले आइतबार नेपाललाई पत्र लेख्दै आगामी अक्टोबरमा साफ आयोजना गर्नको लागि औपचारिक प्रस्ताव गरेको थियो ।
प्रतियोगिता आयोजनाको जिम्मेवारी पाएको बंगलादेशले कोभिड-१९ का कारण साफ गर्न नसक्ने जानकारी दिएपछि नेपालले आयोजनाको दाबी प्रस्तुत गरेको थियो ।
वि.सं.२०७८ साउन १५ शुक्रवार ०८:४०




















