अखबार नेपाल ट्रेन्डिङ

काठमाडौं:  सुनिलस्मृति गाउँपालिका वडा नम्बर ४ ले एकल पुरुषलाई मासिक भत्ता दिने भएको छ । रोल्पाको उक्त गाउँपालिकाले वडालाई दिएको बजेटबाट वडा नम्बर ४ ले एकल पुरुषलाई मासिक भत्ता दिने भएको हो ।

आगामी आर्थिक वर्षदेखि ६० वर्ष उमेर काटेका एकल पुरुषलाई भत्ता दिने प्रस्ताव गाउँसभाबाट पास भएको र अब कार्यविधि बनाएर कार्यान्वयनमा लैजाने वडा कार्यालयले जनाएको छ ।

सुनिलस्मृति गाउँपालिकाले आर्थिक वर्ष २०७८/७९ का लागि वडालाई उपलब्ध गराएको ७० लाख बजेटबाट सामाजिक सुरक्षाको यस्तो कार्यक्रम अघि सारिएको हो ।

वडाले कार्यविधि निर्माण भएसंगै एकल पुरुषलाई मासिक एक हजार नगद दिइने छ । तर अन्य प्रकारका सामाजिक सुरक्षा भत्ता लिएकाहरू यो योजनामा समेटिने छैनन् ।’

वडाले आगामी वर्षका लागि भौतिक पूर्वाधारभन्दा सामाजिक विकासलाई विशेष जोड दिने गरी योजना तथा कार्यक्रम अघि सारेको बताइएको छ ।

त्यस्तै वडाभित्रका दलित, अपाङ्ग र असाहयका लागि निःशुल्क स्वास्थ्य बीमाको कार्यक्रम समेत अघि सारेको वडा कार्यालयले जनाएको छ ।

गाउँपालिका भित्र वसोवास गर्ने दुई सय सात दलित, अपाङ्ग र असाहायहरुका लागि निःशुल्क स्वास्थ्य बीमाको कार्यक्रम अघि सारिएको वडा कार्यालयले जनाएको छ ।

वडा कार्यालयले एकल पुरुषको सामाजिक सुरक्षा भत्ताका लागि एक लाख ३० हजार तथा दलित, अपाङ्ग र असाहयको निःशुल्क स्वास्थ्य बीमाका लागि सात लाख २५ हजार बजेट विनियोजन गरेको छ ।

यस्तै वडाले गरीब विपन्न वर्गको पहुँचसम्म विद्युत् पुर्याउन निःशुल्क उज्यालो कार्यक्रम कार्यान्वयनमा ल्याएको छ। प्रतिमहिना २० यूनिटभन्दा कम विद्युत् खपत गर्ने घरधुरीको विद्युत् महसुल वडा कार्यालयले तिरिदिने जनाएको छ ।

यो पनी पढ्नुहोस् :

काठमाडौं उपत्यकाकामा सार्वजनिक यातायात सञ्चालन गर्न पाइने