अखबार नेपाल ट्रेन्डिङ

काठमडौं:  सवारी चालक अनुमतिपत्रका लागि सामेल भएका परीक्षार्थीहरूले ट्रायल सेन्टरको स्थानपिच्छे फरक फरक नम्बर पाउने भएका छन् । नयाँ कार्यविधिले आठ अंक, स्पिड ब्रेक, ट्रायल परीक्षामा सामेल हुँदा अपनाउनु पर्ने सावधानीहरूमा छुट्टाछुट्टै अंकभारको व्यवस्था गरेको हो ।

भौतिक पूर्वाधार तथा यातायात मन्त्रालयले सवारी चालक अनुमति पत्र कार्यविधि, २०७७ लाई स्वीकृत गरेको छ । कार्यविधि स्वीकृतसँगै सवारी अनुमतिपत्रका लागी लिइने ट्रायल परीक्षा अंक प्रणालीबाट गर्न बाटो खुलेको छ ।

कार्यविधिमा उल्लेख भएअनुसार परीक्षामा ट्रायल दिँदा १०० पूर्णाङ दिइनेछ । पास गर्नका लागि परिक्षार्थीले ७० अंक ल्याउनु पर्नेछ । नयाँ कार्यविधिले सामान्य गल्ती भयो भने चरणवद्ध रुपमा फरक फरक अंक निर्धारण गरेको यातायात व्यवस्था विभागले जनाएको छ ।

कार्यविधिले गरेको व्यवस्थाअनुसार ट्रायल दिनुभन्दा ठिक अगाडि अर्थात सवारीमा चढ्दा र बाइकको अवस्थालाई समेत ख्याल गर्नुपर्छ । हेलमेट, लुकिङ ग्लास, ट्राफिक संकेत,स्टाण्डलगयातमा समेत छुट्टाछुट्टै अंकभारको व्यवस्था गरेको हो ।

बाइक चलाउनुभन्दा अगाडि ब्रेक, टायर र ऐनाहरूको सामान्य निरीक्षण नगरेमा ३ अंक, जथाभावि सवारी चलाएमा ३ अंक, हेलमेट लक नगरी सवारीमा चढेको खण्डमा ४ अंक घट्ने विभागले जनाएको छ ।

ट्रायल परीक्षाको पहिलो चरण घुमाउरो आठमा २० अंक कायम गरिएको छ । एकपटकसम्म रेखा छोएमा र खुट्टाले टेकमा १० अंक घट्नेछ । एक पटकभन्दा बढी गल्ती गरेमा र सवारीको स्टार्ट बन्द भएमा फेल हुने प्रावधान राखिएको छ ।

आठ कटाएपछिको साँघुरो फलेक अथावा बाटोको कुल १० अंक अनिवार्य गरिएको छ । युटर्नमा पनि १० अंक नै कायम गरिएको छ । युटर्नमा साइडलाइट नबालेमा अंक घट्नेछ भने रेखा छोएमा फेल घोषणा गरिने छ । ट्राफिक संकेतको अंकभार १५ राखिएको छ।

त्यस्तै स्पिड ब्रेकमा १५ अंक दिइएको छ । उक्त ब्रेकरमा एक पटकसम्म भुइमा खुट्टा टेके ५ र सवारी स्टार्ट अफ भए ५ नम्बर काटिनेछ ।  उकालोलाई २० अंक दिइएको र यसमा भने एक मात्रै गल्ती भएपनि फेल हुनेछ । ओरालो र उकालोमा भने पहिलाकै नियम कायम रहने कार्यविधिमा उल्लेख गरिएको छ ।

यो पनि पढ्नुहोस् :

नेपाल टेलिकमले फाइभजी परीक्षणको स्वीकृती पायो