अखबार नेपाल ट्रेन्डिङ

काठमाडौं : नेपाल कम्युनिष्ट पार्टी(नेकपा)को बिराटनगरमा हुने आमसभामा भाग लिनको लागि प्रधानमन्त्री केपी ओली बिराटनगर जाने भएका छन् । नेकपा केपीओली समूहले आज विराटनगरमा शक्ति प्रदर्शन गर्ने भएपछि त्यहाँ सम्बोधनका लागि ओली त्यहाँ जान लागेका हुन ।

प्रतिनिधिसभा विघटनपछि विभाजित बनेको नेकपाको ओली समूहले चुनावी प्रचारप्रसार गर्ने तथा सरकारको कदमका पक्षमा जनमत देखाउन विराटनगरमा शक्ति प्रदर्शन गर्न लागेको प्रदेश– १ का अध्यक्ष देवराज घिमिरेले बताए ।

विराटनगर महानगरपालिका–२ को विराट नर्सिङ होमको पूर्वतर्फ रहेको मैदानमा आयोजना हुने जनसभामा दुई लाख जनता उपस्थित हुने घिमिरेले बताए । आमसभालाई प्रधानमन्त्री ओली, गृहमन्त्री रामबहादुर थापा बादल, नेता सुभासचन्द्र नेम्वाङ, प्रदेश १ का मुख्यमन्त्री शेरधन राईलगायतले सम्बोधन गर्ने कार्यक्रम रहेको छ ।

सभामा सहभागी हुने प्रदेश १ का विभिन्न जिल्लाका कार्यकर्ता तथा शुभेच्छुकका लागि १ हजार ५०० सार्वजनिक बसको व्यवस्था गरिएको घिमिरेले बतऐ । साना ठूला गरी १० हजार हाराहारी सवारी साधनमा सहभागीहरू विराटनगरमा उत्रने आकलन गरिएको उनले बताए ।

केन्द्रीय सदस्य विनोद ढकालका अनुसार आमसभा अघि विभिन्न ६ स्थानबाट र्‍याली निस्कने छन् । विराटनगरको कञ्चनबारी, रोडशेष, तीनपैनी, हाटखोला लगायतका स्थानबाट ११ बजे र्‍याली निसक्ने र १२ बजेसम्म सभास्थलमा पुगेर कार्यक्रम सुरू हुने उनले बताए