अखबार नेपाल ट्रेन्डिङ

काठमाडौं: पर्सा राष्ट्रिय निकुञ्जमा एक बटुवालाई बाघले घिसारेर लगेको आशंकामा प्रहरी, नेपाली सेना र निकुञ्जको टोली बटुवाको खोजीमा लागेको छन् ।

जिल्ला प्रहरी कार्यालय बाराका अनुसार एक जना अधवैंशे बटुवालाई शनिबार बिहान पूर्व-पश्चिम राजमार्ग अन्तर्गत अमलेखगञ्ज-पथलैया सडकखण्डबाट बाघले लगेको खबर पाएपछि खोजी भइरहेको हो ।

बिहान करिब ८ बजे ती बटुवा पिसाब फेर्न पूर्व-पश्चिम राजमार्ग छेउको आधाभार जंगल छिरेका थिए । त्यसक्रममा उनलाई बाघले घिसारेर लगेको भनी एक महिलाले प्रहरीलाई सूचना दिएकी थिईन् ।

महिलाको सूचनाका आधारमा प्रहरी, नेपाली सेना र निकुञ्जको टोलीले जंगलमा खोजी गरिरहेको भएपनि फेला पार्न नसकिएको बताईएको छ ।