अखबार नेपाल ट्रेन्डिङ

मकवानपुर: प्रदेश तीनको राजधानी हेटौंडामा बर्डफ्लु पुष्टि भएको पाँच साताको बीचमा ६६ हजार ५सय ४६ कुखुरा र अन्य पंक्षी नष्ट गरिएको छ । जिल्ला वर्डफ्लु रोग नियन्त्रण प्राविधिक समितिले भने यति गर्दापनि बर्डफ्लु नियन्त्रणमा नआएको जनाएको छ ।

एक महिना लामो प्रयासपछि पनि बर्डफ्लु नियन्त्रणमा नआएपछि समितिले रोग नियन्त्रणका लागि कृषि तथा पशुपन्छी विकास मन्त्रालयसँग थप सहयोग माग गरेको छ । समितिकोबैठकले जिल्लास्थित भेटेरिनरी अस्पताल तथा पशुसेवा विज्ञ केन्द्र हेटौंडाको जनशक्तिले रोग नियन्त्रण गर्न नसकेपछि थप मद्दत माग गरेको हो ।

समितिका संयोजक तथा प्रमुख जिल्ला अधिकारी अस्मान तामाङले रोग फैलन नपाओस् भनेर नै मन्त्रालयसँग थप मद्दत माग गरिएको जानकारी दिनुभयो । उहाँकाअनुसार हालसम्म लेयर्स ६५ हजार सात सय ८३, ब्रोईलर चार सय १२ र बिभिन्न प्रजातिका पंछी तीन सय ५१ वटा नष्ट गरिएको छ भने २५ हजार एक वटा अण्डा र चार हजार चारसय ६३ केजी दाना नष्ट गरिएको छ । बर्डफ्लु र अन्य संक्रमणले माघ महिनादेखि यतामात्र तीन लाख बढी कुखुरा मरेको कुखुरा व्यवसायी संघ मकवानपुरले दाबी गरेको छ ।