अखबार नेपाल ट्रेन्डिङ

काठमाडौं: प्रधानमन्त्री केपी शर्मा ओलीले एकलौटी रुपमा मन्त्रीपरिषद् पुर्नगठन गरेपछि पार्टीभित्र असुन्टष्टताको पोको छरपष्ट भएको छ ।

बुधबार प्रधानमन्त्री ओलीले रिक्त तीन मन्त्रालयमा नयाँ मन्त्री नियुक्त गर्नुको साथै केही मन्त्रीको जिम्मेवारीमा हेरफेर गरेका थिए । जसले पार्टीभित्र तीव्र असन्तुष्टि पैदा गरायो ।

पार्टीका अर्का अध्यक्ष पुष्पकमल दाहाल (प्रचण्ड)सँग छलफल गरेपनि अन्य बरिष्ठ नेताहरुसँग छलफल नगरी मन्त्रीपरिषद पुर्नगठन गरेका कारण पार्टीभित्रका बरिष्ठ नेताहरुले असन्तुष्टि पोखेका हुन् । त्यसको असर नवनियुक्त मन्त्रीको सपथग्रहण कार्यक्रममा देखियो ।

नवनियुक्त मन्त्रीहरुको राष्ट्रपति भवन सितल निवासमा सपथ हुँदै गर्दा यता बरिष्ठ नेताहरु रिसले चुर भएका थिए । फलतः उनीहरुले सपथग्रहण कार्याक्रम नै बहिस्कार गरे ।

यो वास्तवमा सांकेतिक बिरोध भन्दा पनि असुन्तिुष्टिको पोको एकैपटक छरपष्ट भएको हो । नवनियुक्त मन्त्रीको सपथग्रहण कार्यक्रममा पार्टी अध्यक्ष दाहाल, बरिष्ठ नेता माधवकुमार नेपाल, झलनाथ खनाल (उनी उपचारका लागि अस्पताल गएका थिए), उपाध्यक्ष वामदेव गौतमले सहभागिता जनाएनन् ।

यसरी पार्टीका नेताहरुले तीव्र असुन्तुष्टि जनाउदा पनि प्रधानमन्त्री ओलीले केही प्रतिकृया जनाएका छैनन् । उनले काग कराउँदै गर्छ पिना सुक्दै गर्छ भने अनुसार आफ्नो काम अगाडी बढाएका छन् । हाल नवनियुक्त मन्त्रीहरुले आआफ्नो मन्त्रालयमा पदबहाली समेत गरिसकेका छन् ।

प्रधानमन्त्रीको कार्यशैलीप्रति असन्तुष्ट रहेपनि प्रचण्डले चुईक्क बोल्न सकेका छैनन् । बोले पनि उनको कुरालाई प्रधानमन्त्री ओलीले सुनेको नसुने झै गर्ने गरेका छन् । ओलीले प्रचण्डप्रति आफ्नो सर्कलका मान्छेहरुसँग खुले आम भन्ने गरेका छन् कि ‘उहाँ मच्चिनुहुन्छ मच्चिनुहन्छ अन्तिममा थच्चिनुको विकल्प छैन ।’