अखबार नेपाल ट्रेन्डिङ

काठमाडौं: राष्ट्रिय विकास परिषदको दुई दिने बैठक राजधानीमा सुरु भएको छ । बैठकको प्रधानमन्त्री केपी शर्मा ओलीले उदघाटन गर्नुभएको छ । होटल सोल्टीमा आयोजना गरिएको बैठकमा नेकपा अध्यक्ष पुष्पकमल दाहाल, उपप्रधान तथा रक्षामन्त्री ईश्वर पोखरेल, अर्थमन्त्री युवराज खतिवडा, कांग्रेस उपसभापति विजयकुमार गच्छदार लगायतको उपस्थिति रहेको छ ।

बैठकमा सहभागी हुन तीनै तहका सरकारी अधिकारीहरु सहभागी भएका छन् । पन्ध्रौं योजनाको आधारपत्रलाई बैठकले अन्तिम रुप दिने राष्ट्रिय योजना आयोगले जानकारी दिएको छ । परिषद बैठकका सुझावसहित समेटेर दीर्घकालीन सोचसहितको १५ औं योजनाको आधार पत्र बैशाख पहिलो साताभित्र सार्वजनिक गरिने आयोगले जानकारी दिएको छ ।

परिषद् बैठकमा प्रदेश सरकारका मुख्य मन्त्रीहरु, संघीय संसदका विषयगत समितिका सभापतिहरु, निजी क्षेत्र, विज्ञहरुसहित करिव ३ सय ५० जनाको सहभागिता छ । आयोगले तयार पारेको १५ औं योजनाको आधार पत्रको मस्यौदामा कृषि, उर्जा, खनिज र पर्यटन क्षेत्रको विकास गरेर मुलुकलाई समृद्ध बनाउने उल्लेख गरिएको छ । परिषद् वैठकले आधारपत्र मस्यौदालाइ अन्तिम रुप दिएपछि त्यसैका आधारमा विकासका योजना अघि बढ्नेछ ।