अखबार नेपाल ट्रेन्डिङ

काठमाडौं: आजबाट सुरु हुने एएफसी कप अन्तरगत को पहिलो खेलमा नेपालको शिर्ष डिभिजन लिग विजेता मनाङ मर्स्याङदीले बंगलादेशी क्लब अबहानी लिमिटेडसँग खेल्दैछ ।

सातदोबाटोस्थित एन्फा कम्प्लेक्सको खेल मैदानमा आपरान्ह ३ बजेपछि मनाङ र अबहानीबीचको खेल हुनेछ । घरेलु मैदानको प्रत्यक्ष फाइदा उठाउँदै मनाङ आजको खेलमा जित हातपार्ने दाउमा छ । उत्कृष्ट प्रदर्शन सहित लिग जितेको मनाङको टिम थप सुधारिएको मनाङका प्रशिक्षक छिरिङ लोप्साङले बताए ।

मनाङको स्ट्राईक, मिडफिल्ड र डिफेन्स तीनै पक्ष अब्बल रहेको कारण घरेलु मैदानमा त्यसको फाईदा उठाउने प्रशिक्षक छिरिङले बताए । यस्तै कप्तान बिराज महर्जनले पनि खेलका लागि शारीरिक र मनोबैज्ञानीक सबै पक्षमा उब्बल रहेका कारण जित हुनेमा ढुक्क हुने बताए ।

यता अबहानीका प्रशिक्षक मारियो लिसिनोले पनि घरेलु मैदानमा मनाङसँग ३ अंक खोस्ने योजना सुनाएका छन् । नेपालको मैदान, यहाँको खेल र मनाङका खेलाडीहरुको अध्ययन गरेर जित्ने मिसनको साथ नेपाल आएको उनले बताए । भारतको चेन्नाई, मिनरोभा पञ्जाब र बंगलादेशको अबहानी लिमिटेडसँगै एएफसि कपको समुह इ मा रहेको नेपालको मनाङले पहिलो खेलमा अवहानीसँग खेल्न लागेको हो ।

मनाङले अवहानी सँगको दोस्रो खेल जुन १९ मा बंगलादेशको ढाकामा खेल्ने छ । होम एण्ड अवेको आधारमा हुने प्रतियोगिताको विजेता टोलीले इन्टर जोन प्ले अफको सेमिफाइनलमा स्थान बनाउने छन् । आजै हुने अर्को खेलमा भारतको आईएसएल विजेता चेन्नईन एएफसीले भारतकै आई लिग विजेता मिनरवा पञ्जावसँग प्रतिष्पर्धा गर्नेछ । यी दुईबीचको खेल अहमदावादमा राती साँढे सात बजे खेलिनेछ ।