अखबार नेपाल ट्रेन्डिङ

रामेछाप: रामेछाप जिल्लाको मन्थलीमा सनिवार विहान कुकुरले टोकेर १४ जना घाइते भएका छन् ।

रेबिज लागेको आशंका गरिएको  कुकुरले टोकेर १४ जनालाई घाइते बनाएको हो । घाइते मध्ये ४ जनालाई थप उपचारका लागि काठमाडौं लगिएको छ भने ९ जनाको  मन्थली स्थित तामाकोसी अस्पताल, रामेछाप सामुदायिक अस्पताल  र प्राथमिक स्वास्थ्य केन्द्रमा उपचार भइरहेको छ ।

कुकुरले जथाभावि मानिसहरुलाइ टोकेर घाइते बनाएको रामेछापका प्रहरी प्रमुख बसन्त पाठकले जानकारी दिनुभयो ।  यस अगाडि पनि कुकुरले मन्थली बजारमा मानिसलाइ टोक्ने गरेको भएपनि एकैदिन यति धेरैलाइ टोकेको  यो पहिलो घट्ना भएको मन्थली नगरपालिकाको  पशु शाखाका रोहणि चापागाईले बताउनु भयो  ।

मन्थलीमा सनिवार कुकुर आतंकनै मच्चिएको थियो । मानिसहरु कुकुर देख्ने वित्तिक्कै भाग्न थालेका थिए । कुकुरले एक महिना अगाडि देखि नै मन्थली बजारमा दुःख दिन थालेको थियो । अहिले अझ कुकुरको विगविगी  बढ्दै गएको छ । रेविज लागेको कुकुरले टोक्दा यस अगाडि मन्थली नगरपालिकामा मात्र ७ वटा पशु मरेका थिए  ।

अहिले पनि नगरपालिका क्षेत्र भित्र २२ वटा पशुलाई रेविज बिरुद्धको खोप दिइरहेको मन्थली नगरपालिकाको पशु शाखाले जनाएको छ । सनिवार विहान मानिसहरुलाई टोक्दै हिड्ने कुकुर पनि रेविज लागेको हुन सक्ने अनुमान गरिएको छ । मानिस देख्ने वित्तिक्कै जथाभावि टोक्दै हिडेको एउटा कुकुरलाइ भने मारिएको छ ।