अखबार नेपाल ट्रेन्डिङ

काठमाडौं: रसुवास्थित भोटेकोशी नदीमा आएको भीषण बाढीका कारण १२ जना पत्रकार र ८ वटा सञ्चारमाध्यम प्रभावित भएका छन्, जसमा धेरै पत्रकार सम्पर्कविहीन छन् । बाढीका कारण बागमती प्रदेशका विभिन्न जिल्लामा पत्रकार र उनीहरूको परिवारलाई ठूलो क्षति पुगेको छ भने सञ्चारमाध्यमहरूको प्रसारण पनि अवरुद्ध भएको छ ।

प्राप्त पछिल्लो विवरण अनुसार पत्रकार टेकबहादुर थामी, सुरेश सिम्खडा, शेखर ढुंगाना र राजकुमार नेपालीको हालसम्म अज्ञात छ । अरु धेरै पत्रकारहरु पनि बाढीले प्रभावित भएका छन् । बाढीका कारण बागमती प्रदेशका विभिन्न जिल्लामा कार्यरत पत्रकार, उनीहरूका परिवार र स्थानीय सञ्चारमाध्यमहरू नराम्ररी प्रभावित भएका छन् ।

प्रेस काउन्सिल नेपाल र नेपाल पत्रकार महासंघले गरेको प्रारम्भिक अनुगमन र विवरण अनुसार बाढीका कारण पत्रकारहरू सम्पर्कविहीन हुने तथा सञ्चारमाध्यमहरूको प्रसारण अवरुद्ध हुने क्रम बढेको छ । महासंघका अनुसार समाचार संकलनका क्रममा केरुङतर्फ गएका महासंघका पूर्वकेन्द्रीय सदस्य टेकराज थामी केरुङबाट सम्पर्कविहीन भएका छन् । उनीसँग अझै सम्पर्क हुन सकेको छैन । केरुङको एक कार्यक्रममा जाने कममा थामी सम्पर्कविहीन भएका हुन । उनी भदौ ९ गते त्यसतर्फ गएका थिए । पत्रकार थामीकी श्रीमती पत्रकार कालिका खड्काले पनि थामीको अझै खबर नआएको बताएकी छन् ।

यसैगरी मानसरोवर भ्रमणमा गएका पत्रकार शेखर ढुंगाना र उनकी पत्नी अझै बेपत्ता छन् । उनीहरु भदौ १० गतेदेखि अहिलेसम्म सम्पर्कमा आएका छैनन् । यस्तै भोटेकोशी नदीमा आएको भीषण बाढीका कारण रसुवामा कार्यरत राष्ट्रिय दलित पत्रकार संघ नुवाकोटका अध्यक्ष राजकुमार नेपाली पनि सम्पर्कमा आएका छैनन् । बाढीको समयपछि पत्रकार केशव न्यौपाने पनि सम्पर्कमा आउन सकेका छैनन् ।

आमा र दिदीसहित तिब्बतस्थित कैलाश मानसरोवर तीर्थाटनमा निस्किभएका शिलापत्र मिडिया नेटवर्कका प्रकाशक सुरेश सिम्खडा पनि भदौ १० गतेदेखि सम्पर्कमा आएका छैनन् । यसैगरी नुवाकोटको विदुर नगरपालिका–७ स्थायी ठेगाना भएका पत्रकार निराजन पौडेलका बुवा वासुदेव, आमा गोमा, काका हिमालय, अन्टी उमा र बहिनी हिमानी पनि भदौ १० गते बिहानदेखि सम्पर्कमा नआएको बताइएको छ ।

मानसरोवर दर्शनका लागि गएका पत्रकार लोग्शरी कुँवरका ससुरा अम्बरकाजी खड्का र सासु मनकुमारी खड्का सम्पर्कमा आएका छैनन् । नुवाकोटको ढुंगेबजारमा रहेको पत्रकार किरण अधिकारीको घर तथा कार्यालय वाढीले बगाएको छ । बाढीका कारण रेडियो नुवाकोटको विद्युत, फाइबर र व्याकअपमा क्षति पुगेको छ । क्षतिका कारण तत्काल सञ्चालन गर्नसक्ने अवस्था नभएको बताइएको छ । यस्तै विद्युत प्रवाह नहुँदा रसुवाको रेडियो लाङटाङको प्रसारण अवरुद्ध भएको छ ।

जालपा रेडियो पनि बाढीका कारण विद्युतको नियमित आपूर्ति नहुँदा बन्द अवस्थामा रहेको छ । यस्तै रसुवा एफ.एम विद्युत् अवरुद्धका कारण सञ्चालनमा आएको छैन् । यसैगरी धादिङका पत्रकार विपिन मल्ल ठकुरीको बैरेनी बजारस्थित घरमा क्षति पुगेका छ । रेडियो नुवाकोट पनि बाढीका कारण तत्काल सञ्चालन गर्नसक्ने अवस्था नभएको बताइएको छ । बाढीको प्रभावका कारण गज्जप रेडियोमा आशिक रुपमा मात्र सञ्चालन भएको छ । उता, बाढीपछि रेडियो त्रिशुली पनि सञ्चालनमा आएको छैन ।

यसैगरी पत्रकार सन्नी श्रेष्ठको बिदुर नगरपालिका–१० स्थित घर र खेतबारीमा बाढीले असर पुर्याएको छ । रसुवाको घट्टेखोला जंगल क्षेत्रमा पत्रकार अनु आचार्यका भाइ अचेत अवस्थामा फेला परेको जानकारी आएपनि अझैसम्म उद्धार हुन नसकेको बताइएको छ । आर्थिक न्युज डटकमका अध्यक्ष तथा प्रबन्ध सम्पादक इन्द्र बानियाँ भने सकुशल काठमाडौं फर्किएको बताइएको छ ।