अखबार नेपाल ट्रेन्डिङ

काठमाडौं: काठमाडौं उपत्यकामा काठमाडौ, भक्तपुर र ललितपुरका सीडीओहरुको बैठकले थप एक साता निषेधाज्ञा लम्ब्याउने निर्णय गरेको छ ।

काठमाडौं उपत्यकामा भदौ ३ गते मध्यरातदेखि जारी निषेधाज्ञा बुधवार मध्यराति सकिँदै थियो । निषेधाज्ञा एक साता थपिसंगै उपत्यकामा भदौ १७ गते सम्म अत्यावश्यक बाहेकका सेवा तथा व्यवसाय चल्न नपाउने काठमाडौंका प्रजिअ जनकराज दाहालले जानकारी दिनुभयो ।

कोरोना संक्रमितको दर दैनिक बढिरहेको भन्दै मंगलबार काठमाडौंका मेयरहरुले काठमाडौंका प्रमुख जिल्ला अधिकारी जनकराज दाहाललाई निषेधाज्ञा लम्ब्याउन सुझाव दिएका थिए ।

संक्रामक रोग ऐन–०२० को दफा २ र स्थानीय प्रशासन ऐन–०२८ को दफा ६ (३) अनुसार जिल्ला सुरक्षा समितीको निर्णय अनुसार प्रमुख जिल्ला अधिकारीलाई निषेधाज्ञा जारी गर्ने अधिकार छ ।

थप गरिएको निषेधाज्ञा अवधिमा आईसोलेशन सेन्टर बढाउने, कन्ट्याक्ट ट्रेसिङ र टेष्टको दायरा बढाउने स्थानीय प्रशासनले निर्णय गरेको छ ।

एक साता लामो निषेधाज्ञापछि उपत्यकामा कोरोना भाइरस संक्रमणको ‘चेन ब्रेक’ भएको उपत्यकाका तीन प्रजिअको निष्कर्ष रहेको छ ।