अखबार नेपाल ट्रेन्डिङ

काठमाडौं: एनएमबी बैंकले गत आर्थिक वर्षमा २ अर्ब २७ करोड छ लाख ७० हजार रुपैयाँ खुद नाफा आर्जन गर्न सफल भएको छ ।

बैंकले गत आर्थिक वर्षको अपरिष्कृत वित्तीय विवरण सार्वजनिक गर्दै बैंकमा कूल निक्षेप १ खर्ब ३१ अर्ब ६६ करोड ३ लाख ६८ हजार रुपैयाँ जम्मा गरेको छ ।

चुक्ता पुँजि १३ अर्ब ९५ करोड रहेको बैंकले पुँजि तथा निक्षेप परिचालन गरी सो नाफा आर्जन गरेको हो । बैंकको वितरण योग्य नाफा भने एक अर्ब ४२ करोड रुपैयाँ छ ।

अघिल्लो आर्थिक वर्षको तुलनामा १५ करोड रुपैयाँले वितरणयोग्य नाफा बृद्धि भएको हो । बैंकले १ खर्ब १५ अर्ब ७० करोड रुपैयाँ कर्जा प्रवाह गरेको छ ।

अघिल्लो आवसँग तुलना गर्दा बैंकको निक्षेप ३४.५० प्रतिशत र कर्जा ३०.७६ प्रतिशत बढेको तथ्याङ्कले देखाएको छ ।

गत आवमा बैंकको खराब कर्जा ०.८२ प्रतिशतबाट बृद्धि भई २.६८ प्रतिशतमा पुगेको छ । बैंकको जगेडा कोषमा ५ अर्ब ८३ करोड रुपैयाँ रहेको छ भने शेयरधनी कोषमा ९६ करोड ४० लाख रुपैयाँ छ ।

बैंकको वार्षिक प्रतिशेयर आम्दानी १६ रुपैयाँ ७३ पैसा, प्रतिशेयर नेटवर्थ १४९ रुपैयाँ ५७ पैसा, मूल्य आम्दानी अनुपात २३.२७ गुणा रहेको छ ।