अखबार नेपाल ट्रेन्डिङ

काठमाडौ: नेपाल सरकारले झाडापखाला न्यूनिकरणका लागि पहिलोपटक खोप दिने भएको छ । स्वास्थ्य सेवा विभाग परिवार कल्याण महाशाखाले पाँच वर्षमुनिका बच्चालाई झाडापखालाविरद्ध खोप ‘रोटारिक्स’ दिने भएको हो ।

महाशाखाका बालस्वास्थ्य तथा खोप सेवा शाखाका प्रमुख डा झलक शर्मा गौतमका अनुसार ‘रोटारिक्स’ यही असारभित्र शुरु गर्नका लागि सात वटै प्रदेशका सबै जिल्लामा पठाइसकेको र उक्त खोप १६ हजार खोप केन्द्रबाट स्वास्थ्य स्वयंसेविकाद्वारा बालबालिकालाई खुवाइने बताए । उनका अनुसार वर्षेनि ३ लाख ५० हजारदेखि ४ लाख बालबालिकालाई झाडापखाला लाग्ने र तीमध्ये ९ प्रतिशत बालबालिकाको मृत्यु हुने गरेकाले त्यसको न्यूनिकरणका लागि उक्त खोप दिन थालिएको बताए ।

बालबालिकामा ४० प्रतिशत रोटा भाइरसका कारणले र ६० प्रतिशत अन्य भाइरस, परजीवी, जीवाणुजस्ता कारणले वर्षको दुईदेखि तीन पटक पखला लाग्ने गरेकोले बच्चाको शरीरमा भएको पानी सकिने (जलवियोजन) कारणले गर्दा बच्चाको मृत्यु हुने गर्दछ । त्यसैले पखाला रोक्नका लागि खोप दिन थालेको र अब नयाँ जन्मने बच्चा र छ महिना पुगेका बालबालिकालाई उक्त खोप पहिलो पटक छ हप्तामा र दोस्रो पटक १० हप्तामा खुवाइने खोपको मात्रा १.५ मिलिलिटर हुने शाखाका प्रमुख डा गौतमले जानकारी दिए ।