अखबार नेपाल ट्रेन्डिङ

रामेछापः वर्षायामको सुरुवातसँगै रामेछाप जिल्लाको गोकुलगंगा गाउँपालिका र उमाकुण्ड गाउँपालिकाको सडकमार्गमा यात्रा गर्न कठिनाई भएको छ । रामेछाप सदरमुकाम मान्थलीदेखि उमाकुण्ड गाउँपालिका च्यादलुसम्मको यात्रा गर्न करिव ७२ किलोमिटर लाग्ने भएतापनि वर्षाका कारण हिलाम्मे सडकले सार्वजानिक सवारी साधनबाट यात्रा गर्न करिव ७ देखि ८ घण्टासम्म लगाएर जोखिमपूर्ण यात्रा गर्न सर्वसाधारण बाध्य छन् ।

उमाकुण्ड गाउँपालिकाको भुजिडाँडादेखि सिंगतिसम्म १८ किलोमिटर सडकखण्डमा वर्षाकै कारण अहिले अवरुद्घ बनेको छ । त्यस्तै उमाकुण्ड गाउँपालिका च्यादलुदेखि लिखु खोलासम्मको बाटोको हालत पनि उस्तै छ । कच्ची सडकमा अस्थायी ढलको व्यावस्था समेत नहुँदा वर्षा लागेसँगै कतिपय स्थानमा पहिरो गएर बाटो अवरोध भएको छ ।

यही कच्ची सडकमार्ग भएर ओखलढुङ्गको रावादोलु, काति, चर्नालु र खिजिफलाटेसम्म कच्ची सडकमार्गले जोडिएको भएतापनि स्थानीय सरकारले यो सडकको बेवास्ता गर्दै अन्य कच्ची बाटोमा ध्यान दिएर बजेट रकम खर्चिएको स्थानीयको गुनासो छ ।

स्थानीय मध्याममार्गी सडकखण्डको कच्ची रुट खोलेकै कारण अहिले उमाकुण्ड-५ प्रितीमा अव्यवस्थित सडक निर्माणले वर्षाका कारण पहिरो जाने भएकोले चलिरहेको बत्तिको कुलो बगाउँदा त्यहाँका स्थानीयहरु अन्धाकारमा रात काट्न बाध्य छन् ।