अखबार नेपाल ट्रेन्डिङ

काठमाडौं: रुपन्देहीमा सामूहिक हत्या गरिएका पाँच जनाकै परिचय खुलेको छ । हत्या गरेका व्यक्तिहरुको घाँटीमा चोट देखिएको छ । हत्या गरिएकाहरुमा रूपन्देही मुगिया बालापुरका ४० वर्षीय माधव मुसहर र उनकी ३७ वर्षीया श्रीमती जानकी मुसहर छिन् । त्यस्तै, रुपन्देहीको तिलोत्तमा-१० का १६ वर्षीय करण चौधरी, १५ वर्षीय आशिष चौधरी र ठेगाना नखुलेका एक १४ वर्षीय पोखराज मुसहर रहेको प्रदेश ५ प्रहरीले जानकारी दिएको छ ।

हत्या गरिएकाहरु तिलोत्तमा नगरपालिका- १० कान्छी बजारका कृष्ण पुनले सञ्चालन गरेको गंगादेवी पशुफार्ममा कार्यरत थिए । हत्यामा संलग्न भएको अरोपमा सुर्खेत घर भई सोही फार्ममा कार्यरत ३१ वर्षीय झकेन्द्र सिंजाली पक्राउ परेका छन् । ती युवकलाई उक्त फार्मभन्दा केही पर नशामा लठ्ठिएर बसेको अवस्थामा फेला पारिएको थियो ।

घटनास्थलमा नशालु पदार्थ र र बियरका बोतल समेत भेटिएका छन् । मृतकहरुको पोष्टमार्टम बुटवलको लुम्बिनी प्रादेशिक अस्पतालमा गरिने र घटनाको छानविन गर्नको लागि प्रदेश प्रहरी कार्यालयबाट एसएसपी राजकुमार बैदवारको नेतृत्वमा अनुसन्धान टोली समेत गठन गरिएको छ ।