अखबार नेपाल ट्रेन्डिङ

एजेन्सीः इन्टरनेशनल काउन्सिल अफ नर्सेस (आईसीएन) ले बुधबार जारी गरेको एक तथ्यांक अनुसार विश्वभरमा कोरोना भाइरसका कारण ६ सय नर्सको मृत्यु भएको जनाएको छ । साथै दुई लाख भन्दा धेरै स्वास्थ्यकर्मी संक्रमित भएका छन् । आईसीएनको रिपोर्ट केही देशको नेशनल नर्सिङ एसोसिएशनको आधिकारिक तथ्यांकमा आधारित रहेको छ ।

हाल विश्वभर कोरोना संक्रमितको संख्या ६५ लाख ६८ हजार ५ सय १० पुगेको छ । यो क्रममा ३१ लाख ६९ हजार २ सय ४३ जना उपचारपछि निको भएका छन् । कोरोना भाइरसबाट हालसम्म ३ लाख ८७ हजार ९ सय ५७ जनाको मृत्यु भएको विश्वस्वास्थ्य संगठनले जनाएको छ । डब्ल्यूएचओका अनुसार युरोपमा कोरोनाबाट मृत्यु हुनेको संख्यामा कमी आएको छ ।

डब्ल्यूएचओका महानिर्देशक टेड्रोस एडहोनम गेब्रेसियोसिस पछिल्लो समय मध्य र दक्षिण अमेरिकाको अवस्था चिन्ताजनक भएको बताएका छन् । ती मुलुकहरुमा कोरोना संक्रमितको संख्या बढिरहेको छ । पछिल्लो पाँच दिनमा ती मुलुकहरुमा एक लाख भन्दा धेरै संक्रमित देखिएका छन् । यसैबीच कोरोना भाइसरको उपचारका लागि हाइड्रक्सिक्लोरोक्वीनको ट्रायल फेरि सुरु हुने बताइएको छ ।