अखबार नेपाल ट्रेन्डिङ

जनकपुर: पूर्वराजा ज्ञानेन्द्र शाहले मुलुकमा शान्ति, प्रगति र एकताको आवश्यकता रहेको बताउनुभएको छ । जनकपुरधामस्थित जानकी मन्दिरमा पूजाअर्चनापछि पूर्वराजा शाहले नेपाली जनता जहाँ बसे पनि शान्तिले बस्न पाउन भनेर आफूले कामना गरेको बताउनुभयो ।

राजसंस्थाको पक्षमा नाराबाजी भइरहेकै समयमा मन्दिर पुग्नुभएका पूर्वराजा शाहले जानकी मन्दिरसँगै जनक मन्दिर सवा लाख शालीग्राम मन्दिर र विवाह मण्डपमा समेत पूजा गर्नुभएको थियो । राजसंस्था फर्काउन खोजिएको हो कि भन्ने सञ्चारकर्मीको प्रश्नमा पूर्वराजा शाहले यसको जवाफ जनताले नै दिने टिप्पणी गर्नुभयो ।

करिब ४० मिनेट मन्दिर परिसरमा बिताउनुभएका पूर्वराजा शाहले मन्दिर परिसरमा उपस्थित सर्वसाधारणसँग हात मिलाउनुभएको थियो । साथै, उहाँलार्इ जानकी मन्दिरका महन्थ रामतपेश्वर दास बैष्णवले प्रसाद एवं मायाको चिनो प्रदान गर्नुभएको थियो ।