अखबार नेपाल ट्रेन्डिङ

लण्डनः विश्वभर महामारीको रुप लिएको कोरोना भाइरसको संक्रमणबाट बेलायतमा तीन नेपालीको मृत्यु भएको छ । उनीहरूमध्ये दुई जनाको बुधबार र अर्का एक जनाको मंगलबार मृत्यु भएको हो ।

लण्डनको ह्यारोमा बस्दै आएका ५९ वर्षीय पूर्व गोर्खा चेतप्रसाद गुरुङको मंगलबार लण्डनस्थित नर्थविकपार्क अस्पतालमा निधन भएको छ । पारिवारिक स्रोतका अनुसार रुघाखोकी, ज्वरो लगायतका लक्षण देखिएर केही दिन घरमै आइसोलेसनमा बसेका उनी एक साताअघि अस्पताल भर्ना भएका थिए ।

मधुमेहका रोगी समेत रहेका उनको स्वास्थ्य अवस्था नाजुक बनेपछि सोमबारदेखि भेन्टिलेटरमा राखिएको थियो । पर्वत पैंयू स्थायी घर भएका गुरुङ सामाजिक क्षेत्रमा पनि सक्रिय रहँदै आएका थिए । मंगलबार गुरुङको निधन भएकै नर्थविक अस्पतालमा बुधबार अर्का एक नेपालीको पनि निधन भएको छ ।

बुधबार नै बेलायतको नटिङहममा बस्दै आएका ५८ वर्षीय पूर्व गोर्खा शिव श्रेष्ठको पनि निधन भएको छ । करीब एक साताअघिदेखि आइसोलेसनमा बस्दै आएका श्रेष्ठ श्वासप्रश्वासमा समस्या भएपछि बुधबार बिहान मात्रै अस्पताल भर्ना भएका थिए । बुधबार दिउँसो अस्पतालमै मृत्यु भएका उनलाई हृदयघातको समेत आशंका गरिएको छ । सोलुखुम्बु घर भएका श्रेष्ठका श्रीमती र दुई छोरासहित बेलायतमा बस्दै आएका थिए ।

बेलायतमा कोरोनाबाट ज्यान गुमाउने नेपालीहरूको संख्या ५ पुगेको छ । यसअघि ६६ वर्षीय पूर्व गोर्खा लीलाबहादुर राई र ४० वर्षीय प्रशान्त अर्यालको पनि दुई साताअघि लण्डनमै कोरोनकै कारण मृत्यु भएको छ ।