अखबार नेपाल ट्रेन्डिङ

काठमाडौं: लकडाउनको तेस्रो दिन आज पनि काठमाडौं उपत्यकासहित देशभरका शहर सुनसान देखिएको छ । सरकारको निर्देशनको पूर्णपालना गर्दै कोरोना भाइरसको रोकथाम तथा नियन्त्रणको प्रयासलाई नेपालीहरुले साथ दिएका छन् ।

लकडाउनका कारण काठमाडौंका सडक तथा बजार क्षेत्र आज पनि सुनसान छन् । दैनिक उपभोग्यका पसलहरु भने बिहान फाट्टफुट्ट खुलेका छन् । तरकारी, दूध किन्नका लागि केही मानिसहरु पसलमा देखिएका छन् ।

तर कतिपयले भने लकडाउनलाई गम्भीर रुपमा नलिएको पाइएको छ । जसका कारण सुरक्षाकर्मीहरुले लकडाउन उल्लंघन गर्नेहरुलाई नियन्त्रणमा लिनु परेको जनाएको छ । लकडाउनको अवज्ञा गर्नेलाई कारवाही गर्ने महानगरीय ट्राफिक प्रहरी महाशाखाले जनाएको छ । कतिपय स्थानमा सुरक्षाकर्मीहरुले ठाउँठाउँमा माइकिङ गर्दै घरभित्रै बस्न आग्रह गरेका छन् । सरकारले शहरका भित्री क्षेत्रमा सुरक्षाकर्मीको सक्रियता बढाएको जनाएको छ ।

लकडाउनको अवज्ञा गर्दै विनाकाम हिँडडुल गर्ने र सवारीसाधन चलाउनेहरुलाई प्रहरीले नियन्त्रणमा लिने गरेको छ । ऐन निर्माण भएको करिब ५७ वर्षपछि पहिलो पटक लागू भएको सङ्क्रामक रोग ऐन, २०२० को दफा २ अनुसार लकडाउनको अवज्ञा गर्नेलाई कारवाही गर्ने सरकारी तयारी छ ।