अखबार नेपाल ट्रेन्डिङ

काठमाडौं: बैंकहरुलाई आफ्नो एटिएम बुथमा पैसा अभाव हुन नदिन बैंकर्स संघले अपिल गरेको छ । ग्राहकले चाहेका बेला पैसा झिक्न सक्ने गरि पैसाको व्यवस्था गर्न संघले अनुरोध गरेको हो ।

सरकारले एक साताका लागि लकडाउन गर्दा बैंकहरुले आफ्ना सम्पूर्ण शाखा कार्यालय खोल्न सम्भव नभएपछि संघले एटीएम बुथ नभएका काउन्टरमा कर्मचारी राख्न समेत निर्देशन दिएको छ । संघले सम्पूर्ण बैंकहरुलाई आफ्ना बैंकिङ कारोबार तथा सुविधा मोबाइल, फोन, इमेलमार्फत जानकारी गराउन र सेवा प्रदान गर्न भनेको छ ।

एटीएम नभएका शाखाले केही समय पैसा राख्ने र झिक्ने कामका लागि खोल्नु पर्नेछ तर उनीहरुले अन्य बैंकिङ कारोबार गर्न पाउने छैनन् । बैंकहरुले नगद बाहेकका अन्य आकस्मिक सेवाका लागि मूल्य कार्यालय वा तोकिएका कार्यालयबाट प्रतितपत्र ‘एलसी’, ग्यारेन्टी, ट्रेजरी जस्ता सेवा उपलब्ध गराउने छन् ।

स्थानीय निकायमा रहेका बैंकहरुले स्थानीय प्रशासनसँग अनुमति लिएर बैंकिङ कारोबार गर्न पाउने संघले जनाएको छ । बैंकले आफ्ना सुविधा प्रदान गर्दैगर्दा कर्मचारीको उपयुक्त स्वास्थ्य सुरक्षाको प्रवन्ध मिलाउनु पर्नेछ ।

संघले यस अगाडि नै सम्पूर्ण बैंकहरुलाई डिजिटल बैंकिङ मार्फत् सेवा प्रदान गर्न अनुरोध गरिसकेको छ । बैंकहरुले सम्पूर्ण एटीएममा नियमित रुपमा पैसा हालेर ग्राहकहरुलाई पैसाको अभावको हुन नदिने योजना बनाएका छन् । बैंकहरुले तीन हजार ६ सय ६२ वटा एटीएममार्फत् बैंकिङ सुविधा प्रदान गर्दै आएका छन् । हाल बाणिज्य बैंकहरुका मात्रै तीन हजार २ सय ७४ वटा शाखा कार्यालय छन् । प्रत्येक एटिएममा २० लाख रुपैयाँसम्म पैसा राख्न मिल्छ । नोटको अभाव हुने भएकाले पनि बैंकहरुले डिजिटल बैंकिङका लागि सम्पूर्ण ग्राहकलाई अनुरोध गरेका हुन् ।