अखबार नेपाल ट्रेन्डिङ

काठमाडौं: विश्वभर महामारीको रुपमा फैलिएको कोरोना भाइरस नियन्त्रणका लागि छिमेकी मुलुक भारतले २१ दिनसम्म लकडाउन गर्ने घोषणा गरेको छ ।

भारतीय प्रधानमन्त्री नरेन्द्र मोदीले टेलिभिजनबाट देशका नाममा सम्बोधन गर्दै मंगलबार मध्यरातदेखि तीन साता अर्थात २१ दिनसम्म भारतमा राष्ट्रिय लकडाउन गर्ने घोषणा गरेका हुन् । सम्बोधनको क्रममा उनले भनेका छन्, ‘म प्रधानमन्त्रीको रुपमा होइन, तपाईंका परिवारको सदस्यका रुपमा भनिरहेको छु । २१ दिनका लागि बिर्सिनुस् कि बाहिर निस्किँदा के हुन्छ । घरमै बस्नुस् र एकै काम गर्नुस् कि आफ्नो घरमै बस्नुस् ।’

स्वास्थ्य विज्ञहरुले कोरोना भाइरसको साइकल तोड्न कमसेकम २१ दिन महत्वपूर्ण हुने मोदीले बताएका छन् । स्वास्थ्य सम्बन्धी पूर्वाधार मजबुत बनाउन केन्द्र सरकारले १५ हजार करोड रुपैयाँ छुट्याएको पनि उनले बताएका छन् ।

प्रधानमन्त्री मोदीले सामाजिक दूरी नै कोरोना भाइरसविरुद्ध लड्ने महत्वपूर्ण हतियार भएको बताएका छन् । उनले जनता कर्फ्युको पालनाले भारतीयहरु कोरोनासँग लड्न सक्षम भएको उल्लेख गरेका छन् । हालसम्म भारतमा कोरोनाबाट ५ सय १९ संक्रमित भएको र १० जनाको मृत्यु भएको छ । भारतले सीमा नाका बन्द गरेको छ भने अन्तर्राष्ट्रिय उडानसमेत स्थगित गरेको छ ।