अखबार नेपाल ट्रेन्डिङ

काठमाडौं: ६५ वर्षअघिको कोशी सम्झौता कार्यान्वयन गर्न माग गर्दै सप्तरी, सुनसरी र उदयपुरका किसानहरु कोशी ब्यारेजको पूर्वी कन्ट्रोल रुम अगाडि रिले अनसन बसेको एक महिना पुगेको छ ।

सप्तकोशी नदीमा पुल निर्माणका कारण कटान र डुबानमा परेको जग्गाको क्षतिपूर्ति र मुआब्जा उपलब्ध गराउनुपर्ने माग राख्दै सुरु भएको रिले अनसनको एक महिना पुग्दासम्म कतैबाट सुनुवाइ हुन नसकेको पिडितको गुनासो छ । नेपाल र भारतले १९५४ मा कोशी ब्यारेज बाँध सम्झौतामा गर्दा बाँध निर्माणका कारण कटान र डुबान भएका जग्गाको मुआब्जा भारत पक्षले दिनुपर्ने सम्झौता भएको थियो ।

तर, ६५ वर्ष बितिसक्दा पनि सम्झौता कार्यान्वयन भएको छैन । कोशी सम्झौता अनुसार नदीले कटान र डुवान गरेको करिब ५६ हजार ३ सय १२ कठ्ठा जग्गाको क्षतिपुर्ति भारतले उपलब्ध गराउनुपर्ने हुन्छ । स्थानीय तहका कार्यालय मार्फत मुआब्जाका लागि सिफारिस हुँदै आएपनि केन्द्रबाट पहल नभएको पनि पीडितहरुको गुनासो छ । पछिल्लो पटक २०६९ भदौमा भएको सर्वपक्षीय बैठकले कटान भएका करिब साढे ७ हजार विघा जग्गाको लगत संकलन गरेर साढे ८० करोड रुपैयाँ मुआब्जा उपलब्ध गराउन सिफारिस समेत गरेको थियो ।