अखबार नेपाल ट्रेन्डिङ

तनहुँ: सैक्षिक क्षेत्रको गुणस्तर, रचनात्मक तथा संरचनात्मक सुधार साथै स्मार्ट विद्यालयको अवधारणा अनुसार तनहुँको भानु-१० स्थित श्री चोक मावि रामपुरटारमा सात दिने धार्मिक महोत्सव सम्पन्न भएको छ । श्री चोक मावि रामपुरटारको आयोजनामा सम्पन्न महोत्सवमा सो क्षेत्रका स्थानीय लगायत, लम्जुङ, गोर्खा, कास्की वरपरका क्षेत्रबाट ठुलो संख्यामा भक्तजनको घुइँचो लागेको थियो ।

महोत्सवमा भक्तजनले गरेको दानबाट करिव ४५ लाख रुपैयाँ संकलन भएको आयोजक समितिका कोषाध्यक्ष पुरुसोत्तम पन्तले जानकारी दिएका छन् । संकलन भएको उक्त रकम श्री चोक मावि रामपुरटारको शैक्षिक सुधार तथा भौतिकपुर्वाधार निर्माणमा लगानी गरिने भएको छ । धार्मिक तथा सैक्षिक महा–महोत्सवका संकल्पकर्ता ईश्वरशरण महाराज तथा नरेश नेपालले कथा वाचन गरि सुनाएका थिए ।

महोत्सव समापनमा सहभागी नेपाली कांग्रेसका केन्द्रीय सदस्य तथा पुर्व मन्त्री शंकर भण्डारीले शैक्षिक क्षेत्रमा प्रशस्त बजेट भएपनि सरकारले संधै माग्ने पारा देखाएको बताए । भण्डारीले शैक्षिक क्षेत्र लगायत समग्र राष्ट्रको विकासका लागि व्यक्तिको मानसिकता परिवर्तन आवश्यक रहेको बताउँदै विकास निर्माणमा वाधा अड्चन खडा गर्न केहि तत्व सक्रिय रहेको आरोप समेत लगाए ।

महोत्सवमा सहभागी प्रदेश चारका अर्थ मन्त्री किरण गुरुङ, नेकपा नेता कृष्णकुमार श्रेष्ठ लगायत स्थानिय जनप्रतिनिधिले शैक्षिक क्षेत्रको गुणस्तर सुधारका लागि आ–आफ्नो क्षेत्रबाट सहयोगको प्रतिवद्धता जनाएका थिए । महोत्सवमा सहभागीलाई स्वैच्छिक रुपमा दान गर्न वा नसके कसैको करकापमा नपर्न पनि राजनीतिक दलका प्रतिनिधिले आग्रह गरेका थिए । महोत्सवमा संकलन रकमको सहि सदुपयोग हुनेमा स्थानिय अभिभावक र विधार्थी आशावादी देखिएका छन् ।