अखबार नेपाल ट्रेन्डिङ

काठमाडौं: कैलाश प्रसाद ढुंगेलले एमालेको १०औँ राष्ट्रिय महाधिवेशनमा भूगोलको ‘क्लस्टर’बाट पहिलो उम्मेदवारी घोषणा गरेका छन् ।

एमालेको केन्द्रीय सदस्यसहित रामेछाप जिल्ला इन्चार्जसमेत रहेका ढुंगेलले बागमती प्रदेशबाट खुलातर्फ केन्द्रीय सदस्यमा उम्मेदवारी घोषणा गरेका हुन् ।

संकटको समयमा पार्टीलाई जोगाउन र संगठन धान्ने पंक्तिको समर्थन आफूलाई हुने बताएका छन् । आफू भूगोलमै क्रियाशील रहन बागमतीकै प्रतिनिधित्व गरेर केन्द्रीय सदस्य बन्न लागेको ढुंगेल बताउँछन् ।

ढुंगेलको नाम केवल रामेछाप मात्रै सिमित छैन । नेकपाकालमा पार्टीभित्र देखिएको अन्तरविरोध मिलाउन होस् वा एमाले ब्यूँतिसकेपछि ओली माधबको टसललाई नेता कार्यकर्ताको तहबाट दबाब दिने भूमिकामा होस् उनी अहिले देशब्यापी चर्चामा छन् ।

रामेछापमा एमाले कार्यकर्ताले कैलाश ढुंगेललाई ‘कैलाश बा’ भनेर पनि चिन्ने गरिन्छ । पटक-पटकको पार्टी विभाजनमा ‘शतिसाल’ भई उभिँदै आएका ढुंगेल केपी ओली संस्थापक अध्यक्ष रहेको युवा संघका संस्थापक केन्द्रीय सदस्य पनि हुन् ।

रामेछाप प्रदेशसभा क्षेत्र ‘ख’बाट भारी मतका साथ विजयी भएका ढुंगेल बागमती प्रदेशको आर्थिक मामिला तथा योजनामन्त्री समेत हुन् ।

साढे ३ वर्ष आर्थिक मामिला तथा योजनामन्त्री बनेका ढुंगेलले केही लोकप्रीय कार्यक्रम पनि ल्याएका थिए । कोभिडका कारण बाबु र आमा गुमाएका बालबालिकालाई मासिक ३ हजार रुपैयाँ भत्ता उपलब्ध गराउने र अन्य कारणले बाबु आमा गुमाएका बालबालिकालाई मासिक २ हजार रुपैयाँ सामाजिक सुरक्षा भत्ता उपलब्ध गराउने कार्यक्रम निकै प्रशंसा बटुलेका कार्यक्रम हुन् ।