३ बर्ष पछि लाप्चाने इलाका प्रशासन संचालनमा
वि.सं.२०७७ कात्तिक १५ शनिवार १६:०१
रामेछाप: अधिकृत स्तरको कर्मचारी नभएकाले वितग ३ बर्षदेखि वन्द भएको रामेछापको उमाकुण्ड गाउंपालिकामा पर्ने लाप्चाने इलाका प्रशासन कार्यालय संचालनमा आएको छ ।
सरकारले अहिले उक्त कार्यालयमा अधिकृत स्तरको कर्मचारी पठाएपछि कार्य संचालन हुन थालेको हो । जिल्लाको सवै भन्दा दुर्गम मानिने उक्त क्षेत्रमा ५ बर्ष अगाडि इलाका प्रशासन कार्यालय स्थापना गरिएको थियो । अधिकृत स्तरका कर्मचारी नभएपछि बन्द भएको इलाका प्रशासन कार्यालय अहिले संचालनमा आएको रामेछापका प्रमुख जिल्ला अधिकारी रुद्रा देवी शर्माले बताउनु भयो ।
इलाका प्रशासनले मुद्धा, शान्तिसुरक्षा, संघसंस्था, हातहतियार, वजार अनुगमन बाहेक अन्य काम संपादन गर्ने गर्छ । नागरिकता प्रमाण पत्र, राहदानी सिफारीस र जनजाति प्रमाणीतको काम स्थानीय स्तरमानै गर्नका लागि सरकारले इलाका प्रशासनको व्यवस्था गरेको थियो ।
कार्यालय संचालनमा आएपछि उमाकुण्ड गाउंपालिका र गोकुलगंगा गाउंपालिकाको केहि भागका नागरिकले सोहि कार्यालयबाटै सेवा लिन थालेका छन । ०७३ साल साउनमा जिल्ला प्रशासन कार्यालयबाट प्रमुख जिल्ला अधिकारी सहितको राजनैतिक दलका नेता, पत्रकार तथा नागरीक अगुवाहरु गएर उक्त स्थानमा इलाका प्रशासन कार्यालय स्थापना गरेका थिए ।
अधिकृत सहित ५ जना कर्मचारीको दरबन्दि रहेको उक्त कार्यालयमा एक जना पनि कर्मचारी नभएपछि कार्यालय बन्द भएको थियो । तिन बर्ष अगाडि ताला लगाएर मन्थली झरेका कर्मचारी अहिले गएर ढोका खोलेर सेवा दिन थालेको स्थानीय श्याम श्रेष्ठले बताउनु भयो ।
सेवा बन्द भएको तिन बर्ष सम्म लाप्चानेबाट न कार्यालय हटाइएको थियो न त्यहाँ सेवा संचालनका लागि कर्मचारी नै पठाईएको थियो । कार्यालय बन्द भएको लामो समयपछि सेवा पाएकोमा स्थानीयहरुले खुशी व्यक्त गरेका छन् । खुल्ने बित्तिक्कै बन्द भएको उक्त कार्यालय अव भने नियमित खुल्नु पर्नेमा उनिहरुको जोड छ ।
वि.सं.२०७७ कात्तिक १५ शनिवार १६:०१