अखबार नेपाल ट्रेन्डिङ

काठमाडौं: दिनप्रतिदिन दिनको समय क्रमशः बढ्ने क्रम जारी रहेको मौसमविद्ले बताएका छन् । अंग्रेजी महिना डिसेम्बरयता दिन एक घण्टा लामो भइसकेको छ । मौसम पूर्वानुमान महाशाखाको रेकर्ड अनुसार सबैभन्दा छोटो दिन मानिएको गत डिसेम्बर २२ तारिखमा ५ बजेर १४ मिनेटमा सूर्यास्त भएको अर्थात् घाम डुबेको थियो भने आज (मार्च ५) मा ६ बजेर ७ मिनेटमा घाम डुब्नेछ ।

यस्तै डिसेम्बर २२ मा ६ बजेर ५१ मिनेटमा सूर्य उदाएको थियो भने आज (बिहीबार) ६ बजेर ७ मिनेटमा सूर्य उदाएको थियो । यस हिसाबले करिब एक घण्टा दिन लामो भइसकेको महाशाखाले जनाएको छ । दिन लम्बिने क्रम जारी रहेको र सबैभन्दा लामो दिन आउने जुन २२ तारिखलाई मानिने मौसम पूर्वानुमान महाशाखाले बताएको छ ।

दिन जति लम्बिँदै गयो तापक्रम पनि उति बढ्दै जाने मौसमविद्ले बताएका छन् । महाशाखाका मौसमविद् मीनकुमार अर्यालका अनुसार काठमाडौं उपत्यकासहित देशभर न्यूनतम र अधिकतम तापक्रम बढ्दै गएको बताए । यही मार्च १ तारिख (फागुन १८) अर्थात् प्रि-मनसुन सुरु भएदेखि मुलुकभर तापक्रम बढेको हो ।

प्रि-मनसुन अवधि मार्च, अप्रिल, मे र जुन तापक्रम बढी हुने महिना हुन् । महाशाखाको रेकर्ड अनुसार बुधबार काठमाडौंको अधिकतम तापक्रम २३.५ डिग्री सेल्सियस मापन भएको छ । यस्तै बुधबार धनगढीमा २९, दिपायलमा २७.२, वीरेन्द्रनगरमा २५.८, नेपालगन्जमा २८.६, दाङमा २५.७, पोखरामा २४.५, भैरहवामा २८.७, सिमरामा २९ र विराटनगरमा २८.६ डिग्री रेकर्ड भएको जल तथा मौसम पूर्वानुमान महाशाखाले जनाएको छ ।