अखबार नेपाल ट्रेन्डिङ

काठमाडौं: पञ्चेश्वर बहुउद्देशीय आयोजनाको विस्तृत परियोजना प्रतिबेदन (डिपिआर) तयार पार्न नेपाल भारतका विज्ञहरुको तेस्रो बैठक आजदेखि काठमाडौंमा शुरु हुँदैछ ।

बैठकमा नेपालका तर्फबाट उर्जा, जलस्रोत तथा सिँचाइ सचिव नेतृत्वको टोली सहभागी हुनेछ । दुई दिनसम्म चल्ने बैठकले पञ्चेश्वर बहुद्देशीय आयोजनाको डिपिआरलाई अन्तिम रुप दिने विषयमा छलफल केन्द्रित हुने बताईएको छ ।

आजबाट शुरु हुने बैठकले डिपिआरलाई अन्तिम रुप दिन नेपाल र भारतबीच सहमति हुन नसकेका १ सय ३० विषयलाई टुंग्याउने विषयमा केन्द्रीत हुने बताईएको छ । यसैबीच प्रधानमन्त्री केपी शर्मा ओलीले हिजो उर्जा, जलस्रोत तथा सिँचाइ मन्त्री वर्षमान पुन, उर्जामन्त्रालयका सचिव तथा अन्य कर्मचारीलाई बोलाएर पञ्चेश्वरको डिपिआर नेपालीलाई हित हुने पक्षमा बनाउन निर्देशन दिनुभएको छ ।

प्रधानमन्त्री ओलीले नेपालको दोधारा चाँदनी सिँचाईका लागि भारतले १० घनमिटर प्रतिसेकेण्ड अर्थात् ३ सय ५० क्यूसेक पानी उपलब्धध गराउने सहमति जनाएकोमा त्यसलाई यथासम्भव छिटो कार्यान्वयन गराउन पहल गर्न पनि निर्देशन दिनुभएको छ । दुई देशका विज्ञहरुको बैठक भोलिसम्म सञ्चालन हुनेछ ।।