अखबार नेपाल ट्रेन्डिङ

काठमाडौं: राष्ट्रिय सभा निर्वाचनमा नेपाली कांग्रेस, नेकपा एमाले, नेपाल कम्युनिस्ट पार्टी र जनता समाजवादी पार्टीबीच भागबन्डा हुने भएको छ । यी दलहरू गठबन्धन गरेर माघ ११ गते हुने राष्ट्रिय सभाका १८ सिटको निर्वाचनमा जान लागेका हुन् ।

राष्ट्रपतिबाट मनोनित वामदेव गौतमसहित १८ जनाका लागि हुने निर्वाचनमा चारै दलले भागबण्डा मार्फत् अगाडि बढ्ने अवस्था रहेको ब्रिफिङ अध्यक्ष केपी शर्मा ओलीले मंगलबार एमाले सचिवालय बैठकमा गरेका छन् । ओलीको ब्रिफिङ अनुसार कांग्रेस सभापति शेरबहादुर देउवा र नेकपाका संयोजक पुष्पकमल दाहाल प्रचण्डबीच भागबण्डाबारे छलफल भइसकेको छ । यसमा अब उपेन्द्र यादव र महन्थ ठाकुर नेतृत्वको जसपा नेपाल पनि जोडिनेछ ।

छलफलमा कांग्रेस र नेकपा पनि सकारात्मक रहेकाले राष्ट्रिय सभामा सिट बाँडफाँट हुने निश्चित भएको ब्रिफिङ ओलीले गरेका हुन् । उनले सबै मिल्दा भागबन्डाका क्रममा १, २ सिट तलमाथि हुने पनि बताए । ‘राष्ट्रिय सभामा एमाले, कांग्रेस, नेकपा लगायत मिलेर जाने अवस्था देखिन्छ । सिट बाँडफाँड भइसकेको छ’, ओलीको ब्रिफिङबारे एमालेका एकजना सचिवालय सदस्यले भने, ‘कांग्रेसले ८, एमालेले ७, नेकपाले २ र जसपाले एक सिट लिने भद्र सहमति भएको ब्रिफिङ ओलीले गर्नुभएको छ । उहाँले १,२ सिट तलमाथि हुन सक्ने पनि बताउनु भएको छ ।’

नेकपाका संयोजक प्रचण्ड र सहसंयोजक माधव नेपाल तयार भए त भन्ने प्रश्नमा एमालेका अर्का नेता भन्छन्, ‘प्रचण्ड कमरेडसँग अध्यक्षज्यूले भेट्दा पनि यो छलफल भएको रहेछ । उहाँहरू मिलेर नगए दुई सिट पनि पाउने अवस्था छैन । ठूलो दल कांग्रेस हो । ऊ तयार नहुँदासम्म कुरा मिल्ने कुरा थिएन । तर अहिले सहमति भइसकेको छ। यसैगरी भागबण्डा मिल्छ ।’ ती नेताका अनुसार प्रतिनिधि सभा निर्वाचनबारे छलफल भएको छैन । यता कांग्रेस प्रवक्ता डा. प्रकाशशरण महत पनि नेकपा र एमालेसँग राष्ट्रियसभामा मिलेर जान तयार रहेको बताउँछन् ।

११ माघमा हुने राष्ट्रिय सभा निर्वाचनको उम्मेदवारी दर्ता पुस २३ गतेलाई तोकिएको छ। एमालेका ८, नेकपा माओवादी केन्द्रका ७, एकीकृत समाजवादीका १, जनता समाजवादी पार्टी नेपालका १, लोकतान्त्रिक समाजवादी पार्टीका १ र मनोनीत १ सांसद छन् । जसमा मधेश प्रदेशका ४, कोशी र लुम्बिनी प्रदेशका ३/३ तथा बागमती, गण्डकी, कर्णाली र सुदूरपश्चिमका २/२ जना सदस्यको पदावधि २० फागुनबाट सकिन लागेको हो ।