अखबार नेपाल ट्रेन्डिङ

रामेछाप: रामेछापको दोरम्बा शैलुङ गाउँपालिका-३ लेखखर्कमा गएराती गएको पहिरोमा परी हालसम्म ६ जनाले ज्यान गुमाए छन् । घटनामा सोही ठाउँका ११ वर्षीय अन्जना श्रेष्ठ घाइते भएकी छिन् भने ४ जना बेपत्ता भएका छन् । वेपत्ताहरूको खोजी कार्य जारी रहेको जिल्ला प्रहरी कार्यालय रामेछापले जानकारी दिएको छ ।

घाईते श्रेष्ठको कम्मरभन्दा मुनिको भाग नचल्ने जिल्ला प्रहरी कार्यालय रामेछापले जनाएको छ । उनको उपचारका  लागि दोरम्बा स्वास्थ्य चौकीबाट चिकित्सकको टोली बोलाइएको जिल्ला प्रहरी कार्यालय रामेछापले जनाएकव छ । प्रहरीका अनुसार पहिरोमा परि दोरम्बा शैलुङ गाउँपालिका वडा नं ३ लेखखर्क बस्ने ३० वर्षीय चण्डिका श्रेष्ठ र सोही ठाउँका १८ महिनाका नाबालक आमुष श्रेष्ठको मृत्यु भएको छ । त्यस्तै सोही ठाउँका ५७ वर्षीय उर्मिला पहरी, ३० वर्षीय सन्दीप पहरी, ११ वर्षीय सन्तोष पहरी, १४ वर्षीय विज्ञान पहरीलाई मृत अवस्थामा फेला पारिएको जिल्ला प्रहरी कार्यालय रामेछापले जानकारी दिएको छ ।

आज बिहान लेखखर्कस्थित पहरी गाउँमा अविरल वर्षाका कारण गाउँ माथिबाट भल बाढी र पहिरो आई ३ वटा घर बगाएको र एक घर पहिरोले पुरिएको जिल्ला प्रहरी कार्यालय रामेछापले जनाएको छ । घटनास्थलमा रामेछापका प्रहरी प्रमुख प्रहरी नायव उपरीक्षकको टोली सहित ११ जनाको टोली, नेपाली सेना, सशस्त्र प्रहरी र स्थानीय जनप्रतिनिधिको सहयोगमा खोजी उद्धारको काम जारी रहेको छ ।